53-гадовага гродзенца Валерыя Рынкевіча асудзілі паводле шасці артыкулаў Крымінальнага кодэкса. Сярод іх — падрыхтоўка да ўдзелу ў масавых беспарадках, «рэабілітацыя нацызму», распальванне варожасці, абраза і паклёп на Аляксандра Лукашэнку. Якое пакаранне прызначылі мужчыну, пакуль невядома.
Паводле звестак праваабарончага цэнтра «Вясна», поўнае імя мужчыны — Валерый Казіміравіч Рынкевіч. Ён нарадзіўся 2 лістапада 1972 года і жыў у Гродне.
Паводле звестак BELPOL, якія прыводзіць «Наша Ніва», раней Рынкевіч працаваў кіроўцам пагрузчыка на беларуска-польскім сумесным прадпрыемстве «Эксклюзіў». Выданне таксама піша, што мужчына цікавіўся палітычнымі навінамі і пакідаў каментары ў некаторых інтэрнэт-супольнасцях.
Мог вярнуцца з-за мяжы
«Наша Ніва» выказала здагадку, што Рынкевіч мог працяглы час працаваць за мяжой, а крымінальны пераслед пачаўся пасля яго вяртання ў Беларусь. З 2019 года мужчына значыўся ў беларускіх базах беспрацоўным.
Асудзілі паводле шасці артыкулаў
Справу Рынкевіча разглядаў Гродзенскі абласны суд. Паводле інфармацыі «Вясны», прысуд вынеслі 20 жніўня 2026 года.
Гродзенца прызналі вінаватым паводле наступных артыкулаў Крымінальнага кодэкса:
- ч. 1 арт. 130 — распальванне варожасці або варажнечы;
- ч. 1 арт. 130−1 — «рэабілітацыя нацызму»;
- ч. 1 арт. 13 і ч. 2 арт. 293 — падрыхтоўка да ўдзелу ў масавых беспарадках;
- ч. 1 арт. 368 — абраза Аляксандра Лукашэнкі;
- ч. 2 арт. 367 — паклёп на Аляксандра Лукашэнку;
- арт. 370 — здзек з дзяржаўных сімвалаў.
Што менавіта стала падставай для кожнага з абвінавачанняў, невядома. Магчыма, пераслед мужчыны звязаны з каментарамі, якія ён пакідаў у інтэрнэце.
Від і памер прызначанага пакарання праваабаронцам невядомыя. Таксама не паведамляецца, дзе цяпер знаходзіцца Рынкевіч.
Унеслі ў спісы «тэрарыстаў» і «экстрэмістаў»
У ліпені 2026 года КДБ унёс Валерыя Рынкевіча ў пералік людзей, якіх беларускія ўлады лічаць «датычнымі да тэрарыстычнай дзейнасці». Уключаным у яго людзям, сярод іншага, абмяжоўваюць правядзенне фінансавых аперацый. Калі чалавек знаходзіцца ў зняволенні і трапіў у такі спіс, яму забараняюць грашовыя пераводы.
11 верасня прозвішча Рынкевіча таксама з’явілася ў пераліку грамадзян, «датычных да экстрэмісцкай дзейнасці». Падставай стаў прысуд Гродзенскага абласнога суда, які набыў законную моц.
