Журналіста Анджэя Пачобута вызвалілі з беларускай калоніі — ці адновяць цяпер пасажырскія чыгуначныя зносіны паміж Беларуссю і Польшчай? Выданне «Люстэрка» запыталася ў МУС Польшчы і Міністэрства адміністрацыі і лічбавізацыі.
Аднаўленне руху не разглядаюць
Польскае ведамства адказала, што на дадзены момант планаў па аднаўленні пасажырскага чыгуначнага руху няма і заканадаўчая праца ў гэтым кірунку не вядзецца.
У адказе МУС адзначаецца, што сітуацыя на мяжы з Беларуссю разглядаецца як частка «гібрыднай вайны» супраць Польшчы і ЕС, а адказнасць за міграцыйныя працэсы ўскладаецца на Мінск і Маскву.
— Поўная адказнасць за лёс мігрантаў на беларускім баку ляжыць на ўладах гэтых краін, якія інструментальна выкарыстоўваюць гэтых людзей у палітычных мэтах, арганізоўваючы спробы штурму мяжы, — заявілі ў польскім ведамстве.
Пра якія маршруты гаворка
Гаворка ішла пра магчымае аднаўленне пасажырскіх зносін на кірунках:
- Кузніца — Гродна
- Тэрэспаль — Брэст
- Варшава — Мінск
Аднак цяпер на гэтых чыгуначных пераходах дазволены толькі грузавы рух або абмежаваныя катэгорыі перавозак.
Умацаванне мяжы з боку Польшчы
У польскім МУС заявілі, што для барацьбы з нелегальнай міграцыяй былі ўзмоцнены меры бяспекі і ўкладзены значныя сродкі ў абарону мяжы.
— Мы інвеставалі 3 млрд злотых у эфектыўную абарону польска-беларускай мяжы, пабудавалі сучасную фізічную агароджу і запусцілі электронны бар’ер, аснашчаны сучаснай электронікай. Колькасць мігрантаў, якія спрабуюць перасекчы мяжу, скарацілася амаль на 96% — у першым квартале 2022 года было 3,3 тысячы спроб нелегальнага перасячэння, а ў першым квартале 2026 года іх было ўсяго 158. Пры гэтым герметычнасць агароджы складае 100%. У гэтым годзе не было ніводнага выпадку яе нелегальнага прарыву, — паведамілі ў МУС Польшчы.
Чаму няма цягнікоў «Гродна — Кузніца» і «Брэст — Тэрэспаль»?
Польскі ўрад абмежаваў чыгуначныя перавозкі вясной 2020 года ў сувязі з пандэміяй каранавіруса. Тады ўказамі міністра ўнутраных спраў і прэм’ер-міністра прыпынілі зносіны з усімі суседнімі краінамі. У 2021 годзе большасць цягнікоў вярнулася. Але не саставы ў Беларусь і Расію.
Пасля заканчэння пандэміі новай прычынай не аднаўляць зносіны стаў для польскіх уладаў міграцыйны крызіс, які пачаўся ў 2021 годзе.
