У 00.00 20 лістапада па літоўскім часе аднавілі працу пункты пропуску «Беняконі» — «Шальчынінкай» і «Каменны Лог» — «Мядзінінкай». Літва адкрыла мяжу з Беларуссю датэрмінова. Рэдакцыя Hrodna.life паглядзела, што пра гэта кажуць.
Літва закрывала мяжу 26 кастрычніка — на тэрмін да 30 лістапада. Прычынай сталі аэрастаты з цыгарэтамі, якія запускаюць кантрабандысты. Кіраўніцтва краіны назвала гэта гібрыднай атакай Беларусі. «Шальчынінкай» не функцыянаваў наогул, а праз «Мядзінінкай» прапускалі асобныя катэгорыі грамадзян і транспарту. Пасля адкрыцця Польшчай пунктаў пропуску Літва перагледзела пастанову.
Аднымі з першых 20 лістапада ў Літву праехалі фуры. Пасля закрыцця мяжы на тэрыторыі Беларусі апынуліся «заблакаванымі» 4,5 тысячы грузавікоў і паўпрычэпаў. Ім абмежавалі рух па тэрыторыі Беларусі. Перавозчыкі гублялі па 1000 еўра ў дзень.
Чэргі на мяжы з Літвой
На 10.00 20 лістапада, паводле сайта Дзяржпагранкамітэта, у «Каменным Логу» на выезд з Беларусі каштуе 570 грузавікоў і нуль легкавікоў. У «Беняконях» — 355 грузавікоў і таксама ніводнага аўтамабіля.
Увечары прайсці мяжу з Беларусі ў Літву ў «Каменным Логу» можна было за гадзіну-паўтара. Літоўскія памежнікі працавалі хутка, але некаторых адправілі на «рэнтген». «Спачуваю я тым, хто будзе ехаць першыя тыдні на аўтобусе, будзе ахтунг», — паведамляе беларус. Працу беларускіх памежнікаў таксама хвалілі. Да раніцы мяжу з абодвух бакоў можна было прайсці за паўгадзіны.
У «Беняконях» увечары таксама не было чаргі - толькі карэспандэнты на беларускім баку. Да раніцы яна не сабралася.
Аўтобусы ў Літву
Яшчэ да таго, як апублікавалі падрабязнасці пастановы Літвы, перавозчыкі абвясцілі аб аднаўленні рэйсаў. Даступныя маршруты ў Вільню з Гомеля, Мінска і Гродна. Рэйсы стартуюць ужо 20 лістапада. Яны працягваюць дадавацца.
