Жыхары некалькіх сельсаветаў Гродзенскага раёна скардзяцца на баброў. Жывёлы валяць дрэвы і будуюць плаціны на рэках і меліярацыйных каналах. У выніку вада затапляе агароды, участкі і дарогі. Найбольш праблем узнікла ў Падлабенскім сельсавеце.

«За ноч будуюць новую плаціну»

Найбольш ад баброў пакутуюць жыхары Баяраў, Наўмовічаў, Ратцаў і Кулакоўшчыны. Паводле падлікаў мясцовых жыхароў, на трохкіламетровым участку тут налічваецца каля 30 бабровых хатак.

Жыхар Баяраў Рамуальд Сінкевіч ужо тры гады спрабуе справіцца з наступствамі дзейнасці баброў. Ягоны ўчастак знаходзіцца прыкладна за 300 метраў ад мясцовай рачулкі. Возера на тэрыторыі сядзібы знікла, а агарод рэгулярна затапляе, піша раённая газета «Перспектыва».

«Актыўна змагаюся з бабрамі ўжо тры гады. Прычым яны працуюць і ўвосень, і ўзімку. Я ўжо стаміўся, яны мацнейшыя за мяне. Толькі прыбяром пабудаваную плаціну — вада сыходзіць. А за ноч бабры ўзводзяць новую. І зноў участак затапляе», — расказвае мужчына.

Плаціны дасягаюць 1,5–2 метраў у вышыню, а хаткі — 5–6 метраў у шырыню.

Падтапляе і суседнія ўчасткі. Мужчыну таксама непакоіць, што вада падмывае асфальт на дарозе праз вёску. Жыхарам даводзіцца ўмацоўваць яго камянямі і бетонам. Акрамя таго, бабры забіваюць бярвёнамі трубы, праз што невялікія рэчкі ператвараюцца ў азёры.

Паводле ацэнак Сінкевіча, ад Баяраў да Ратцаў налічваецца каля 50 плацін і прыкладна 100 баброў. А паваленых галінак і дрэў хопіць на дзесяць КамАЗаў дроў.

Старшыня Падлабенскага сельвыканкама Святлана Сарока пацвярджае скаргі жыхароў. Яна паведаміла, што накіравала заяўку ва ўпраўленне сельскай гаспадаркі і харчавання з просьбай дапамагчы вырашыць праблему.

У адных вёсках бабры замінаюць, у іншых — ужо сышлі

На грызуноў скардзяцца і ў іншых сельсаветах. Ліст у райвыканкам накіравалі з Капцёўскага сельвыканкама.

Старшыня гэтага сельвыканкама Таццяна Лоска расказвае, што раней бабры жылі далёка ад Капцёўкі і нікому не заміналі. Сёлета яны наблізіліся да вёскі і пачалі грызці дрэвы — сем з іх давялося спілаваць. Пазней плаціну прарвала, жывёлы перабраліся праз дарогу і затапілі прысядзібны ўчастак мясцовага жыхара. Пасля выезду камісіі райвыканкама бабры сышлі. Цяпер сітуацыя супакоілася.

Праблемы ёсць і ў дачнікаў таварыстваў «Дубок» і «Юность-80». Паводле слоў старшыні Гожскага сельвыканкама Наталлі Макавчык, бабры падгрызаюць дрэвы і будуюць плаціны.

У Парэцкім сельсавеце цяпер баброў няма, хоць раней яны жылі ў раёне Новай Руды. У Індурацкім сельсавеце жывёлы сяліліся каля Лужкоў, Наваду́бовай, Інду́ры і Дубоўкі, але ўвесну пасля меліярацыйных работ на ўчастку ад Луцкаўлян да Дубоўкі сышлі.

У Азёрскім сельсавеце скаргаў ад жыхароў і рыбакоў няма. Старшыня сельвыканкама Алена Іванчыкава адзначае, што хаткі на невялікіх рэчках стаяць ужо не першы год. На меліярацыйных каналах каля Стрыеўкі, Старыны і Лакна бабры будуюць хаткі, грызуць дрэвы і кідаюць галінкі ў каналы. За іх ачысткай сочыць СПК «Азёры Гродзенскага раёна».

На баброў у Капцёўцы скардзіліся яшчэ ўлетку

У чэрвені 2026 года жыхары аграгарадка Капцёўка ўжо скардзіліся на баброў, якія пасяліліся на возеры ў цэнтры населенага пункта.

Тады мясцовыя жыхары расказвалі, што жывёлы грызуць дрэвы і чарот, пашкоджваюць бераг і засмечваюць плаціну галінкамі. З пачатку года каля вадаёма спілавалі сем дрэў. Адзін з жыхароў паведамляў пра пашкоджанне хаткі для лебедзяў і абвальванне берага. Бабры заходзілі і ў двары, траплялі на камеры відэаназірання. Мясцовыя жыхары баяліся падтапленняў праз засмечаную плаціну.

Тады ў сельвыканкаме абмяркоўвалі адлоў і перасяленне жывёл. Таццяна Лоска звярталася ў Гродзенскую абласную арганізацыйную структуру БООР. Там патлумачылі, што для гэтага патрэбны дазвол Мінпрыроды. Пасля гэтага яна накіравала ліст у Гродзенскі райвыканкам. Ва ўпраўленні сельскай гаспадаркі і харчавання паабяцалі абследаваць вадаём і берагі, а таксама падрыхтаваць заяўку ў міністэрства на адлоў баброў без выкарыстання агнястрэльнай зброі. Такім жа чынам некалькі гадоў таму перасялялі бабра з Аўгустоўскага канала.

Што рабіць, калі бабры затапілі ўчастак

Самастойна лавіць баброў або адсяляць іх з населеных пунктаў нельга. Калі жывёлы пагражаюць людзям або наносяць істотную шкоду, трэба звярнуцца ў райвыканкам.

Пасля абследавання тэрыторыі і складання акта заяўку накіроўваюць у Мінпрыроды. Калі міністэрства яе ўхваляе, дазвол перадаюць у БООР, і паляванне праводзяць без выкарыстання агнястрэльнай зброі. Паляўнічыя часцей за ўсё ўсталёўваюць для гэтага пасткі. Месячная пуцёўка каштуе 20 рублёў, яшчэ 20 рублёў трэба заплаціць за здабыты трафей.

Намеснік старшыні Гродзенскай абласной арганізацыйнай структуры БООР Марк Баранскі адзначае, што на баброў скардзяцца і леснікі: праз дзейнасць жывёл забалочваюцца лясныя пасадкі.

У паляўнічых угоддзях абласной структуры БООР налічваецца каля 4200 баброў. Іх колькасць з году ў год застаецца прыкладна на адным узроўні. Жывуць жывёлы сем’ямі да дзесяці асобін.