Белстат апублікаваў вынікі выбарчага апытання людзей, якія перасякалі граніцу 11 красавіка 2026 года. Улады расказалі, якія тавары фізічныя асобы часцей за ўсё ўвозілі ў Беларусь і што забіралі з сабой за мяжу.
Практычна кожны другі падарожнік перасякаў граніцу з таварам: пра ўвоз пакупак у Беларусь заявілі 43,3% тых, хто ўязджаў, а пра вываз — 42,5% грамадзян, якія выязджалі.
Усяго раздалі 2621 анкету ў шасці аўтадарожных пунктах пропуска. У выніку запоўнілі 1748 анкет. Прыкладна палову з іх запоўнілі беларусы, а палову — грамадзяне іншых краін.
Што і адкуль увозяць у Беларусь?
Галоўным гандлёвым партнёрам для «шопінгу» фізічных асоб застаецца Польшча — адтуль увезлі 71% ад агульнага кошту ўсіх тавараў. На другім месцы з вялікім адрывам размясцілася Літва (21,1%).
Топ-тавараў, якія вязуць у Беларусь, выглядае так: камп’ютарная тэхніка і тэлефоны, аўтазапчасткі, бытавая тэхніка, сантэхніка, электраінструменты і бензапілы, абутак, адзенне, прадукты харчавання.
Пры гэтым з Польшчы і краін Еўрасаюза ў цэлым у Беларусь праз санкцыі афіцыйна забаронены вываз шырокага пераліку тавараў, уключаючы тыя, што перавозяцца фізічнымі асобамі для асабістага карыстання. Пад абмежаванні патрапілі электроніка і бытавая тэхніка (уключаючы смартфоны, ноўтбукі і тэлевізары), аўтазапчасткі, маторныя маслі, сантэхніка, бытавая хімія, парфумерыя, жаночае адзенне, жывыя расліны, аптычныя прыборы і шэраг далікатэсаў.
Што і куды вывозяць з Беларусі?
Галоўным кірункам для вывазу тавараў з РБ таксама стала Польшча. Другім па папулярнасці кірункам апынулася Латвія.
Вывозяць тыя ж камп’ютары і тэлефоны, бытавую тэхніку, адзенне, абутак, а таксама бензін і дызельнае паліва.
Навошта і куды едуць: мэты паездак і турыстычныя патокі
Трэць беларусаў, выязджаючы за мяжу, мелі на мэце наведаць родных і блізкіх. На другім месцы сярод мэтаў — працаўладкаванне, на трэцім — адпачынак, лячэнне і экскурсіі. Пры гэтым абсалютная большасць беларусаў накіроўвалася ў Польшчу і Літву. Таксама ехалі ў Германію, Італію і Францыю.
Замежнікі ў Беларусь прыязджалі да сваякоў або праязджалі нашу краіну транзітам. Ехалі палякі, літоўцы, латышы і немцы.
Большасць такіх паездак як у замежнікаў, так і ў беларусаў у абодва бакі былі кароткатэрміновымі — не больш за пяць дзён (гэта адзначылі 50,8% беларусаў і 55,8% замежнікаў).
Што тычыцца пражывання, то і нашы суайчыннікі за мяжой, і замежныя госці ў Беларусі часцей за ўсё спыняліся ў сваякоў і знаёмых. Пры гэтым кожны пяты замежнік падарожнічаў наогул без начлегу.
