Адкрыўся і закрыўся. Што адбываецца з цюбінгавым схілам у Каробчыцах і калі адкрыецца лыжны?

Цюбінгавую трасу на гарналыжным комплексе ў Каробчыцах адкрылі для катання 15 лютага. Але ўжо праз тры дні комплекс абвясціў, што яна спыніць працу з 21 лютага.

«Цюбінгавая траса, на жаль, з чацвярга спыняе сваю працу», — напісалі ў Instagram парку актыўнага адпачынку «Каробчыцкі Алімп». У сераду, 19 лютага — апошні дзень, калі можна пакатацца на цюбінгах. Траса адкрыта з 15:00 да 22:00. Прычыны закрыцця трасы не патлумачылі. Гэта канчатковае рашэнне, напісалі ў каментарах да паста ад імя парку.

Пры гэтым з 21 лютага адкрыюць для катання аматарскую трасу для горных лыж і сноўборда. Будзе працаваць і пад’ёмнік. У чацвер, 20 лютага, комплекс абвясціў выхадны, каб яе падрыхтаваць.

На другі дзень працы здарылася надзвычайнае здарэнне

Ужо на наступны дзень пасля адкрыцця цюбінгавай трасы ў Каробчыцах там адбыўся няшчасны выпадак. Калі 10-гадовая дзяўчынка спускалася з гары, у яе ўрэзаліся два іншыя цюбінгі.
Дзяўчынка каталася з мамай. Пасля сутыкнення дзіця атрымала множныя пераломы нагі. Ёй аказалі медыцынскую дапамогу — цяпер яе здароўю нічога не пагражае. Гродзенскі міжраённы аддзел Следчага камітэта пачаў праверку.

У той жа дзень, але ўжо на іншай, неабсталяванай горцы ў адным са спальных раёнаў, 11-гадовы хлопчык урэзаўся ў іншы цюбінг. Дзіця атрымала чэрапна-мазгавую траўму.

Падобны інцыдэнт здарыўся і летась у мікрараёне Альшанка — тады дзіця атрымала некалькі пераломаў.