У падследных з Навагрудка пачалі арыштоўваць маёмасць. Палітвязня Мікіту Аўдзіка пераводзяць на іншы рэжым. Гродзенскі блогер Вадзім Ермашук (Vadimati) з’ехаў з Беларусі. Рэдакцыя Hrodna.life вывучыла, што адбылося ў вобласці з 2 па 8 снежня.
Палітвязня Мікіту Аўдзіка пераводзяць на іншы рэжым
У палітвязня на 2 снежня прызначанае пасяджэнне «Аб замене абмежавання волі без накіравання ў папраўчую ўстанову адкрытага тыпу». Працэс вядзе Мікалай Лабоцкі ў судзе Кастрычніцкага раёна, паведамляе Telegram-канал «Право имеют».
Мікіта Ігаравіч Аўдзік — кухар-кандытар з Гродна. За ўдзел у пратэстах яго асудзілі на год калоніі. Ён павінен быў адбыць пакаранне ў чэрвені 2022 года. Магчыма, яго асудзілі па новай справе.
У падследных з Навагрудка пачалі арыштоўваць маёмасць
Крыніцы «Белсата» паведамляюць, што следства па справе арыштаваных мужа і жонкі Аляксандра і Ірыны Лебедзь распарадзілася накласці арышт на ўсе іх маёмасць. Такая ж сітуацыя ў Вольгі Аляшкевіч і Таццяны Палубок. У актывіста Ігара Хіневіча забралі ўсе наяўныя грошы. У выніку гэтых дзеянняў яго сям’я засталася без сродкаў да існавання.
30 кастрычніка ў Наваградку адбылася аблава сілавікоў на мясцовых жыхароў. Пасля ператрусаў затрыманых адвозілі ў Гродна на допыт. Некалькіх чалавек адпусцілі, астатніх да суда пакінулі ў следчым ізалятары. З усіх бралі падпіску аб неразгалошванні. Дагэтуль невядомая дакладная колькасць затрыманых.
Палітзняволеную з Гродна Валерыю Драгун памілавалі
Юрый Васкрасенскі паведаміў імёны сямі жанчын, вызваленых па апошнім указе аб памілаванні. Усяго ў рамках памілавання, праведзенага 20 лістапада, былі вызваленыя 32 чалавекі, сярод якіх 8 жанчын і 24 мужчыны. З іх 17 маюць хранічныя захворванні, а 9 — старэйшыя за 50 гадоў.
Валерыя Драгун (2001 года нараджэння) — адна з памілаваных. У чэрвені 2024 года была асуджаная да года пазбаўлення волі за «здзек над дзяржаўнымі сімваламі». Па матэрыялах справы, у красавіку 2024 года яна разам з Дар’яй Заяц падпаліла паперу, наматаную на тронак швабры, і паднесла яе да чырвона-зялёнага сцяга, які вісеў на будынку на вуліцы Сацыялістычнай у Гродне. У судзе абедзве дзяўчыны прызналі сваю віну.
Гродзенскі блогер Вадзім Ермашук (Vadimati) з’ехаў з Беларусі
Актывістка страйкаму з Гродна Юлія Сліўко апублікавала ў Instagram відэа з Варшавы з Вадзімам. Раней паведамлялася, што выдалены акаўнт Vadimati ў Instagram быў прызнаны экстрэмісцкім.
Новая экстрэмісцкая інфармацыя
Суд Ленінскага раёна Гродна на тыдні прызнаў экстрэмісцкімі:
- Instagram-акаўнт «belarus.pro» і яго лагатып,
- Tik-Tok канал «centrbelaruscom»,
- Tik-Tok канал «autapolk»,
- Tik-Tok канал «racyjabelarus»,
- Tik-Tok канал «myzha_info».
Палітвязень Аляксандр Цялега выйшаў на волю
У сярэдзіне лістапада палітвязень выйшаў на волю па заканчэнні тэрміну. Ён правёў больш за 3 гады і 6 месяцаў у зняволенні, паведамляе «Вясна».
У судзе Ленінскага раёна Гродна 21 студзеня 2022 года Аляксандра асудзілі да чатырох гадоў калоніі за каментары ў інтэрнэце. На судзе стала вядома, што адзін з «пацярпелых» па справе збіваў Цялегу пры затрыманні. 1 лістапада 2022 года над палітвязнем пачаўся новы працэс у судзе Пухавіцкага раёна, зноў за каментары. У выніку суд прызначыў яму адзін год зняволення, але шляхам паглынання больш строгага пакарання менш строгім тэрмін пакінулі ранейшым.
У красавіку Аляксандру ўзмацнілі рэжым пакарання і перавялі на турэмны рэжым у Магілёў.
7 жыхароў вобласці судзілі за распаўсюд экстрэмісцкіх матэрыялаў
Па арт. 19.11 КаАП «Распаўсюд, выраб, захоўванне, перавозка інфармацыйнай прадукцыі, якая змяшчае заклікі да экстрэмісцкай дзейнасці або прапагандуе такую дзейнасць» судзілі жыхароў Гродна, Воранава, Слоніма, Навагрудак. Сярод іх — цёзкі грамадскага актывіста і былога старшыні цяпер ліквідаванай арганізацыі «Экаманіторынг» і вядучага бухгалтара Навагрудскага завода газавай апаратуры.
Альтанка «мінтынгавала» у Астравецкім раёне: гаспадар атрымаў штраф
Актывіста антыядзернага руху Мікалая Уласевіча з мястэчка Варняны аштрафавалі на 50 базавых велічыняў (2 тыс. руб.) у Астравецкім раённым судзе. Як мяркуе «Гарадзенская праваабарона», штраф маглі прызначыць з-за альтанкі на прыватным падворку Уласевіча.
Кіраўніку цыбульнай плантацыі пад Лідай пагражае да 15 гадоў нямецкай турмы за абыход санкцый
Плантацыя «Цыбулька-бел» належыць нямецкаму ультраправаму палітыку Ёргу Дорнау. Мужчыне пагражае да 15 гадоў пазбаўлення волі за абыход санкцый, паведамляе Reform.news са спасылкай на расследаванне тэлеканала MDR Fernsehen.
Асуджаны паляк з Гродна Ежы Жывалеўскі з’явіўся ў прапагандысцкім фільме
Асуджанага на чатыры гады калоніі за агентурную дзейнасць грамадзяніна Польшчы Ежы Жывалеўскага паказалі ў прапагандысцкім фільме «Беларусь 1». На кадрах відаць, што мужчына адчувальна схуднеў.
Асабістыя акаўнты гродзенца Аляксея Чамаданава прызналі экстрэмісцкімі
Экстрэмісцкімі прызналі акаўнты Аляксея Чамаданава ў Facebook, «ВКонтакте» і ў «Одноклассники». За рэпост і ў некаторых выпадках лайк яго пастоў цяпер пагражае адміністрацыйная адказнасць. На практыцы ж караюць і за падпіску.
Гродзенскім студэнтам на экскурсіі ў турме распавялі пра «самыя камфартабельныя ўмовы»
Студэнтаў педыятрычнага факультэта ГрДМУ адправілі на экскурсію ў гродзенскую турму з мэтай «прафілактыкі правапарушэнняў», паведамляецца на сайце ўніверсітэта. Турма лічыцца самай строгай у Беларусі. Студэнтам распавялі пра гісторыю ўстановы, а таксама пагрузілі ў нюансы турэмнага побыту.
Як у Беларусі караюць зa «ілжывыя паказанні» (і не толькі «палітычных»)
Беларусы скардзіліся на дзеянні сілавікоў пры не «палітычных» затрыманнях. Сцвярджалі, што ў працы тыя перавышалі паўнамоцтвы. Але пасля 2020 года справы пачалі ўзбуджаць супраць тых, хто скардзіўся. Іх судзілі за дачу «ілжывых» паказанняў. За тры гады існавання банка судовых рашэнняў знайшлося 12 кейсаў. Папрасілі каманду BelPol пракаментаваць іх.
