У Гродзенскай вобласці перапрызначылі і павысілі суддзяў - некаторыя з іх выносілі прысуды актывістам задоўга да 2020 года. Гродзенскія сілавікі пачалі часцей збіваць пры затрыманні. Гродзенца затрымалі за распаўсюд нацысцкай сімволікі. Рэдакцыя Hrodna.life вывучыла, што адбылося ў вобласці з 23 па 29 верасня.
Палітвязня Віктара Снегура асудзілі за «злоснае непадпарадкаванне адміністрацыі калоніі»
11 кастрычніка Мінскі абласны суд будзе разглядаць апеляцыю на прысуд у дачыненні да Віктара Снегура паводле ч. 2 арт. 411 КК «Злоснае непадпарадкаванне патрабаванням адміністрацыі калоніі». Судовы працэс будзе ўзначальваць суддзя Алег Лапека.
Калі менавіта Віктара судзілі за «злоснае непадпарадкаванне» і якое рашэнне прыняў суд — пакуль невядома, паведамляе «Вясна».
Віктар — фігурант «справы Аўтуховіча». Яго абвінавацілі па шэрагу артыкулаў Крымінальнага кодэкса і асудзілі да 19 гадоў калоніі ва ўмовах строгага рэжыму і 800 базавых велічынь штрафу (25 600 рублёў).
Гродзенскія сілавікі пачалі часцей збіваць пры затрыманні
Сілавікі з Гродна і Брэста пашырылі практыку гвалту пры затрыманнях. Людзей збіваюць падчас аблаў, паведамляе Андрэй Стрыжак з BYSOL.
Ён таксама распавёў, што значна павялічылася колькасць заявак на эвакуацыю і кансультацыю на выпадак пераследу. Па розных напрамках рост колькасці заявак у BYSOL склаў ад 50 да 80%.
Асаблівую цікаўнасць у сілавікоў выклікаюць людзі, якія давалі каментары ці інтэрв'ю незалежным медыям у 2020−2023 гадах. За апошнія тыдні ўзмацніліся рэйды па прафесійных групах — пад ударам актыўныя настаўнікі і асветнікі, а таксама грамадскія актывісты.
Новая «экстрэмісцкая» інфармацыя
Суд Лідскага раёна 20 верасня прызнаў экстрэмісцкімі ТікТок-акаўнт «corbanz» і яго лагатып і TikTok-акаўнт «pravtb». А суд Чыгуначнага раёна Гомеля 24 верасня — інтэрнэт-старонку «ВКонтакте» «Лида — наш город».
Гродзенца затрымалі за распаўсюд нацысцкай сімволікі
Паводле версіі сілавікоў, ён фатаграфаваўся з ускінутай правай рукой і перасылаў малюнкі свастыкі. Хлопец кажа, што ён беспрацоўны.
Палітвязня фігуранта справы «Рабочага Руху» хочуць перавесці на турэмны рэжым
9 кастрычніка ў судзе горада Наваполацка будзе разглядацца справа «аб пераводзе ў папраўчую ўстанову іншага тыпу і змяненняў умоў утрымання» ў дачыненні да Валянціна Цераневіча. Працэс будзе ўзначальваць суддзя Ала Гаціх.
Валянцін Цераневіч — памочнік майстра на заводзе «Хімвалакно». Асуджаны на 12 гадоў калоніі ўзмоцненага рэжыму, паведамляе «Вясна».
Новыя «экстрэмісты»
Сушко Ігар Міхайлавіч з Гродна 27 верасня папоўніў спіс «экстрэмістаў».
На цыбульнай плантацыі нямецкага дэпутата пад Лідай працуюць палітвязні
Нямецкі ўльтраправы дэпутат ад партыі «Альтэрнатыва для Германіі» (AfD) Ёрг Дорнаў заключыў пагадненне з лідскім Цэнтрам ізаляцыі правапарушальнікаў (ЦІП) і рэгулярна прыцягваў беларусаў, асуджаных па палітычных артыкулах, для работ на сваёй цыбульнай плантацыі пад Лідай. Ім плацілі каля 20 рублёў за дзень. Палітык асабіста правяраў працу палітвязняў.
Якую працу прапануюць былым зняволеным
87 вакансій у Гродзенскай вобласці прапануюць вызваленым з месцаў адбыцця пакарання ў выглядзе пазбаўлення волі на пэўны тэрмін. Рэдакцыя Hrodna.life паглядзела, якія там умовы і колькі на іх гатовыя плаціць.
У Гродзенскай вобласці перапрызначылі або павысілі суддзяў
У Гродзенскай вобласці прызначылі новых суддзяў: кагосьці павысілі, кагосьці перавялі, а кагосьці пакінулі на былой пасадзе. Амаль усе з іх выносілі палітычна матываваныя прысуды. Некаторыя судзілі гродзенскіх актывістаў яшчэ ў 2008 годзе.
