Дабраўся і да Гродна: да нас прыехаў нямецкі падарожнік на жоўтым веламабілі

Ужо вядомы на ўсю Беларусь 26-гадовы нямецкі падарожнік Яша Бойтлер увечары 16 снежня на сваім жоўтым веламабілі даехаў да Гродна. Тут ён плануе прабыць два дні.

У Беларусі транспарт Яшы ўжо паспелі празваць бананам, байдаркі на колах і жоўтай субмарынай. У нашай краіне падарожнік ужо пабываў у некалькіх гарадах і ўсюды на яго звярталі ўвагу, нават супрацоўнікі ДАІ.

Сваё падарожжа хлопец пачаў 30 лістапада з нямецкага горада Порта-Вестфаліка. Ён праехаў праз цэнтральную Германію, Польшчу і 8 снежня заехаў у Беларусь праз пункт пропуску «Брэст».

Падарожнічае немец на веламабілі Quest, які выпускаюць у Галандыі. Новы каштуе прыкладна 7500 еўра. У Гродна Яша прыехаў з Ліды, да гэтага ён пабываў у Брэсце, Кобрыне, Пінску, Мінску і іншых гарадах.

У Гродна з Ліды за 5 гадзін

«Колькі я праязджаю у дзень дакладна не магу сказаць, усё залежыць ад шматлікіх фактараў: надвор’е і па якой дарозе ехаць, — распавядае Яша. — У Гродна я ехаў з Ліды дзесьці пяць гадзін. Мог разганяцца да 25−30 км/г. Да гэтага я пабываў у многіх гарадах Беларусі, мне ўсюды спадабалася. Уразілі цэнтральныя вуліцы і плошчы, усюды дагледжана. І прырода ў вас прыгожая, гэта асабліва прыкметна калі едзеш. Мне хацелася прыехаць у Беларусь з-за цікавасці, гэта загадкавая краіна для многіх еўрапейцаў. Пабываўшы тут, я ўжо будую новы план падарожжа ў вашу краіну калі будзе цяплей».

Не страшна, што не ведаюць англійскай

У кожным горадзе Беларусі вандроўніка віталі мясцовыя жыхары і прапаноўвалі сваю дапамогу ў выглядзе начлегу або харчавання.

«Гэта пацешна, што столькі ўвагі, але я звычайны турыст і сам за ўсё плачу. А папулярным у Беларусі я стаў толькі з-за свайго незвычайнага транспарту. Беларусы вельмі прыязныя і ветлівыя людзі, заўсёды прапануюць дапамогу. Мяне не бянтэжыць, што не ўсе ведаюць англійскую. Вы жывяце ў Беларусі і размаўляеце на сваіх мовах. Гэта нармальна, гэта не псуе мой настрой і падарожжа па краіне. Пра Гродна я яшчэ нічога не магу сказаць, толькі прыехаў. Буду адпачываць, а пасля знаёміцца», — дадаў падарожнік.