Вернісаж новай выставы Ad libitum гродзенскага мастака Сяргея Кіркі пройдзе ў Цэнтры гарадскога жыцця 5 ліпеня. Па словах аўтара, гэта будзе першая цалкам абстрактная выстава, пабудаваная на колерах, эмоцыях і адчуваннях. Цікавосткай вернісажа стане выступ гурта Whiskey Logic з Філадэльфіі.
Сяргей прызнаецца, што да абстрактнага жывапісу ішоў даўно і ўжо эксперыментаваў з «беспрадметнымі» працамі абстрактнага тыпу. Але раней «нейкія адценні рэалізму заўжды прысутнічалі». Сёлетняя выстава — цалкам абстрактная. «Усё прысвечана пошуку гармоніі ў колерах».
Безназоўнасць карцін, меркаваннем аўтара, дазволіць больш разнастайна адчуць жывапіс.
«Ты прыходзіш на выставу у адным настроі - бачыш адно. Потым у іншым — і бачыш зусім іншае. Перажыванні кожны раз могуць быць вельмі рознымі. Тыя ж працы выклікаюць іншыя перажыванні і ўспрыняцце. Тым больш, калі прыходзяць розныя людзі».
Работы да выставы ствараліся ад 2017 года. Некаторыя напісаны хутка, над іншымі мастак працаваў у некалькі падходаў. «Перапісваю, замалёўваю, перамалёўваю. Не ведаю, ці гэта правільна, але лічу, што сам маю вырашаць, калі праца ўжо скончана».
Раней за гродзенцаў работы з новай выставы пабачылі ў Даніі. Там летась прайшла першая замежная персанальная выстава Сяргея Кіркі.
«Не чакаў такога ўспрыняцця. Калі ты дома, сярод сяброў, то ведаеш, чаго ад выставы чакаць. Нават калі не спадабалася, усё роўна падыдуць, паціснуць руку, скажуць „старайся“, ці нешта падобнае. А калі прыязджаеш у незнаёмую краіну і цябе віншуюць — гэта ўражвае. Людзі падыходзілі і казалі - „зірні, у мяне мурашкі па скуры пабеглі“. Насамрэч, гэта прыемна».
На думку мастака, такі прыём выставы за мяжой пацвярджае — музыка і жывапіс перадаюць пачуцці без словаў. Дарэчы, музычная частка вернісажу стане яшчэ адной з яго адметнасцяў.
Зрабіць з выставы музыкальна-жывапісны праект мастака натхнілі сябры-музыкі. «Прыехаў з Амерыкі сябар, прывёз свой гурт. Мы аб’ядналіся. Бо і працы былі вельмі моцна замешаны на музычнасці. Яны як імправізацыі да рознай музыкі».
Назва выставы Ad libitum таксама звязана з музыкай. Гэтым тэрмінам пазначаюць імправізацыйныя часткі музычнага твора. Выканаўцам у гэтых выпадках прадастаўляецца свабода ў выбары характару выканання, тэмпу і дынамікі.
А вось у медыцыне тэрмін «ad libitum» азначае, што пазначаныя лекі можна выкарыстоўваць у любых колькасцях. Уласна, тое самае тычыцца і жывапісу Сяргея Кіркі.
Калі звыклыя хобі ўжо надакучылі і больш не прыносяць задавальнення, самы час выйсці за межы…
Мастацтва тэатраў лялек у Беларусі ўзнялося надзвычай высока і 30 гадоў трымала планку якасці. Беларускіх…
«На могілках! А дзе ж яшчэ праводзіць прэзентацыю?» Аўтарка кнігі пра гродзенскі праваслаўны некропаль Святлана…
У Беларусі Света выкладала хімію ў каледжы і працавала ў антыдопінгавай лабараторыі. Зараз яна жыве ў…
Гродна 100 гадоў таму праславілася як “база” серыйных забойцаў Збоньскіх. Адсюль з вуліцы Фабрычнай, 9 цягам…
Журналіст Hrodna.life Руслан Кулевіч летам 2020-га збіраўся згуляць вяселле, а да канца года - выпусціць…