Не толькі бабку. Што яшчэ можна зрабіць з бульбы

Калі вы накапалі шмат бульбы і не ведаеце, што з ёй рабіць (а з’есці такую колькасць не атрымаецца), то вось нашыя парады. Нават калі нічога карыснага з гэтага не атрымаецца, то вы зможаце весела правесці час.

1. Бульбамёт

Гэта тыпова беларуская зброя, хаця з серыялу «Доктар Хаўс» мы даведваемся, што бульбамёты папулярныя і ў Штатах. У Гродне такую пушку стварыла каманда аніматараў «Маскарад». Пастраляць з іх бульбамёта можна на гарадскіх фестывалях. А ў інтэрнэце ёсць відэа, як зрабіць яго самастойна, каб удосталь настраляцца на лецішчы.

2. Касметычныя сродкі

Бульба дапаможа зняць запаленне і паменшыць цёмныя плямы на скуры. Сакрэт — у крухмале, які валодае супрацьзапаленчымі ўласцівасцямі і забяспечвае скуры жыўленне і запас карысных мікраэлементаў. А яе кампрэсы дапамогуць вылечыць трэшчынкі на пятках!

3. Народная медыцына

Бабулі раней пры кашлі ці іншых хваробах лёгкіх варылі бульбу і прымушалі хворага дыхаць гарачай парай. Урачы кажуць, што гэта шкодна, бо можна атрымаць апёкі органаў. А вось для вонкавага прымянення бульба пасуе. Напрыклад, цёплымі кампрэсамі можна зменшыць мышачны боль.

4. Вырабіць электрычнасць

Гадзіннік, які працуе ад бульбы, ёсць у гродзенскай школе № 12. Дзеці расказалі, як бульба можа выпрацоўваць энергію.

— Кіслоты бульбы рэагуюць з металамі, і адбываецца зарад. Калі варыць бульбу 8 хвілін, то сіла зарада павялічваецца ў два разы. Таму што хімічныя элементы бульбы раскладаюцца і лягчэй праводзіцца электрычны ток.

5. У хатняй гаспадарцы

Бульба дапаможа размножыць ружы, пачысціць скуру і срэбра і нават выдаліць іржу. Шукайце адмысловыя парады на тэматычных форумах тыпу «Сад и огород». Хаця б для таго, каб спраўдзіць, ці яны працуюць.

6. Дзіцячую цацку ці пячатку

На бульбе можна рабіць малюнкі, як ліванская мастачка Гіну Шуейры. З бульбы можна выразаць персанальную пячатку і з яго дапамогай рабіць карцінкі-адбіткі. Трэба разрэзаць напалову клубень і на зрэзе выразаць любы малюнак. Гэта дапаможа заняць дзіцяці на некалькі гадзін.