Перад прызямленнем у мінскім аэрапорце былы галоўны рэдактар Telegram-канала, прызнанага ў Беларусі экстрэмісцкім, Раман Пратасевіч, прасіў чальцоў экіпажа не выдаваць яго ўладам. Нагадаем, 23 траўня самалёт кампаніі Ryanair вымусілі здзейсніць пасадку ў Мінску. Увесь свет назіраў за гэтай гісторыяй у прамым эфіры. Hrodna.life вывучыў, што напісалі пра інцыдэнт калегі за мяжой.
Самалёт кампаніі Ryanair, які выконваў 23 траўня палёт з Афін у Вільню, здзейсніў экстраную пасадку ў мінскім аэрапорце. Указанні пасадзіць самалёт пілоты атрымалі ад беларускіх дыспетчараў. У гэты час яго суправаджаў баявы знішчальнік Міг-29. На борце было 170 пасажыраў з 12 краін. Сярод іх — рэдактар Telegram-канала, прызнанага ў Беларусі экстрэмісцкім, Раман Пратасевіч. Пратасевіча, а таксама яго дзяўчыну, затрымалі і пакінулі ў Беларусі. Самалёт і пасажыраў даглядзелі. У Вільню борт прыбыў са спазненнем на восем з паловай гадзін.
The Washington Post
«Еўрапейскія лідары асуджаюць улады Беларусі пасля пасадкі самалёта і затрымання апазіцыйнага журналіста»
«У нядзелю беларускія ўлады вымусілі грамадзянскі самалёт, які ляцеў над краінай, прызямліцца ў Мінску і арыштавалі на борце апазіцыйнага журналіста — акт, які некаторыя еўрапейскія лідары параўноўваюць з захопам.
Захоп рэйса Ryanair, які ляцеў паміж Афінамі і Вільняй, Літва — сталіцамі дзвюх краін НАТА — у апошні час не меў прэцэдэнтаў. Еўрапейскія лідары заявілі, што разглядаюць магчымасць увядзення санкцый супраць Беларусі".
The Mirror
«Самалёт Ryanair „вымушана прызямлілі“ ў Беларусі праз фальшывую пагрозу выбуху бомбы, каб затрымаць журналіста»
«Самалёт Ryanair, на борце якога знаходзіўся «абвешчаны ў вышук» журналіст, здзейсніў вымушаную пасадку ў Беларусі праз меркаваную пагрозу выбуху бомбы.
Калі драма разгортвалася ў палёце, у самалёце знаходзіліся 170 чалавек з 12 краін.
Ваенны знішчальнік Су-29 і верталёт Мі-24 былі паднятыя ў паветра, каб развярнуць самалёт з Вільні на Мінск.
Праваахоўныя органы затрымалі 26-гадовага актывіста Рамана Пратасевіча, абвешчанага ў вышук пасля леташніх масавых вулічных пратэстаў пасля выбараў, на якіх Лукашэнка атрымаў пераканаўчую перамогу".
Financial Times
«У Беларусі, пасля вымушанай пасадкі рэйса Ryanair у Менску, арыштавалі актывіста»
The New York Times
«Беларусь захапіла лайнер з дысідэнтам, каб затрымаць яго.
Прэзідэнт Беларусі Аляксандр Лукашэнка накіраваў знішчальнік, каб прымусіць самалёт прызямліцца, і арыштаваць Рамана Пратасевіча, вядомага апазіцыйнага журналіста".
«Гэты ход падкрэслівае гатоўнасць Лукашэнкі пайсці на ўсё, каб здушыць іншадумства. Еўрапейскія афіцыйныя асобы расцанілі дзеянні як «дзяржаўны крадзеж».
Le Monde
«Беларусь прымусіла авіялайнер з апазіцыянерам на борце здзейсніць пасадку ў Мінску.
Лідары Еўразвязу асудзілі Беларусь за «непрымальныя дзеянні», а НАТА заклікала да міжнароднага расследавання. Дваццаць сем удзельнікаў саміту, які сабраўся ў Бруселі, абмяркуюць у панядзелак і аўторак «магчымыя санкцыі»".
BBC
«Акт дзяржаўнага тэрарызму» і «выклік Захаду».
«У нядзелю ў Мінску затрымалі Рамана Пратасевіча — былога галоўнага рэдактара телеграм-канала Nexta, які асвятляў пратэсты ў Беларусі. Ён ляцеў самалётам авіякампаніі Ryanair з Афін у Вільню. Самалёт быў вымушаны экстранна сесці ў Мінску пасля паведамлення аб мініраванні, якое не пацвердзілася. Пратасевіча знялі з борта і затрымалі. Пасажырам давялося пакінуць самалёт і прайсці паўторны дагляд».
