8 красавіка стала вядома, што ў 15 расійскіх будаўнікоў, якія прыбылі працаваць на АЭС, знайшлі каранавірус. Іх шпіталізавалі і ізалявалі. Мы пагутарылі з мясцовымі жыхарамі, якія распавялі, што зараз адбываецца ў Астраўцы.
Клінічных праяў у будаўнікоў няма. Цяпер праводзіцца эпідэміялагічнае расследаванне, высвятляюцца кантакты першага ўзроўню.
Чытайце таксама: Коронавирус нашли у российских строителей в Островце
Што кажуць мясцовыя?
— Сітуацыя ў Астраўцы не вельмі добрая. У нас на пляцоўцы выявілі 15 чалавек з каранавірусам, іх учора ноччу вывезлі з Астраўца, — напісаў 8 красавіка мясцовы жыхар, які працуе на «атамцы» ў сферы IT.
Ён распавёў, што гэтыя будаўнікі працуюць вахтавым метадам. Яны прыехалі ў Беларусь у сакавіку. У Астраўцы знаходзіліся каля двух тыдняў. У Беларусі з Расіяй адкрытая мяжа, так што тады на каранціне будаўнікі не сядзелі.
— Яны хадзілі па крамах, кавярнях, наведвалі ZAMI (гандлёвы цэнтр у Астраўцы — аўт.) кожны дзень. Гэта не жарты, гэта праўда. Надзявайце павязкі, мыйце рукі, у нас цяпер усе на «строме» вельмі вялікім, — напісаў супрацоўнік.
Жылі будаўнікі ў жыллі, якое дае іх арганізацыя. Гэта значыць — звычайныя шматпавярхоўкі ў новым раёне горада. Жывуць там і мясцовыя, і прыезджыя.
Работнік мясцовага ГЦ кажа, што многіх людзей на працы просяць браць адпачынак за свой кошт. 7 красавіка краму цалкам апрацоўвалі пасля закрыцця. Людзей, якія кантактавалі з заражанымі, каля пад’ездаў чакаюць экіпіяваныя медыкі і міліцыя.
Паводле яго слоў, цяпер у горадзе ізалявана каля 190 чалавек. На самой атамнай станцыі праца «пакуль не стала, але, мабыць, дзеянні нейкія плануюць прадпрымаць, бо кіпіш поўны дзеецца».
— Думаю, гэта яшчэ занадта дробная лічба. Улічваючы, колькі іх прыязджае аўтобусамі з «атамкі». У гэты ж час прыходзяць і мясцовыя ў крамы, — кажа мясцовы.
Тэлеграм-канал «Гродненские сливы» паведамляе, што брыгада прыбыла з Ніжняга Тагіла. Ёсць інфармацыя, што некаторыя адмаўляліся ад шпіталізацыі.
Што кажуць на БелАЭС?
На БелАЭС расказалі, якія меры прыняты па папярэджанні распаўсюджвання каранавіруса.
Будаўнікі - з трох субпадрадных арганізацый інжынірынгавага дывізіёна Росатама. Зараз яны знаходзяцца ў лячэбнай установе Гродзенскай вобласці. Як паведамляе, галоўны дзяржаўны санітарны ўрач Астравецкага раёна Ёнас Таль ўсе 15 чалавек цяпер знаходзяцца ў стацыянары Смаргоні. Кажуць, ім зрабілі тэсты на каранавірус адразу па прыбыцці ў Беларусь.
Ужо высветлена кола кантактаў. Іх ізалявалі і пратэставалі. Вынікі чакаюцца ў бліжэйшы час. Сумесна з МНС Беларусі праведзена дэзінфекцыя будынка, у якім пражывалі ўсе спецыялісты.
Тэсты робяць усім сваім прыбываючым спецыялістам. Усе супрацоўнікі забяспечаныя сродкамі індывідуальнай абароны, на ўваходах у будынкі і кантрольна-прапускных пунктах на тэрыторыю будоўлі ўстаноўлены санітайзеры, праводзяцца замеры тэмпературы цела. У выпадку выяўлення прыкмет ВРВІ выдаецца накіраванне ў пункт аховы здароўя і блакуецца пропуск на праход на будпляцоўку.
Што кажуць улады?
Іранічна, але за дзень да выяўлення ў расійцаў каранавіруса, мясцовыя ўлады прынялі Комплексны план па мінімізацыі рызыкі завозу і распаўсюджвання інфекцыі COVID-19 у Астравецкім раёне, паведамляе «Астравецкая праўда».
Кіраўнікі адзначылі, што сітуацыя ў раёне кантралюемая. А таксама даручылі ў розных арганізацыях забяспечыць работнікаў дезсродкамі, пальчаткамі і маскамі, вызначыць графік працы і часовае вызваленне ад яе па стане здароўя, кантроль за правядзеннем вільготнай прыборкі і праветрываннем памяшканняў, і абмежаваць правядзенне масавых мерапрыемстваў.
А таксама — праінфармаваць людзей пра тое, што такое COVID-19 і якія правілы гігіены неабходна выконваць, весці запіс самакантролю стану здароўя з вымярэннем тэмпературы і даць магчымасць работнікам пры наяўнасці сімптомаў заставацца дома.
Паводле стану на 6 красавіка, на лячэнні ў Астравецкай цэнтральнай раённай клінічнай бальніцы знаходзілася 15 чалавек з дыягназам пнеўманія, што не перавышае дадзеных аналагічнага перыяду мінулага года.
150 кіслародных балонаў, 2250 кілаграмаў вадкага кіслароду, 29 апаратаў ШВЛ і 68 кропак падлучэння кіслароду складаюць запасы ЦРКБ, што дазваляе забяспечыць лячэбную ўстанову на 3 месяцы.
Як прасоўваецца будаўніцтва АЭС
Працы на першым блоку Беларускай АЭС знаходзяцца ў фінальнай стадыі, 31 сакавіка прайшла прыёмка інжынерна-тэхнічных сродкаў фізічнай абароны першага блока, цяпер ён гатовы да завозу паліва. 5 красавіка блок быў узяты пад ахову супрацоўнікамі МУС.
