Праз некалькі дзён пра фільм «Белыя росы» ў мікрараёне Дзевятоўка будзе нагадваць адзін толькі калодзеж, побач з якім стаіць таблічка, што нагадвае пра здымкі вядомай савецкай стужкі. Апошнія тры дамы і вялікі сад – усё што засталося ад былой вёскі – пачалі зносіць у пачатку жніўня.
Усім жыхарам прыватных дамоў, якіх ужо амаль не засталося, далі кватэры ў шматпавярхоўцы на вуліцы Лідскай. Не ўсе задаволеныя зменай жылля, але ім выбіраць не прыходзілася.
“Усё сваё жыццё мы пражылі ў гэтых дамах, а цяпер са слязамі павінны іх пакідаць, – распавядае апошняя жыхарка былой вёскі. – На жаль, мы нічога не вырашаем, нам сказалі пераязджаць, мы і пераязджаем. Мы доўгія гады былі пад зносам і толькі ў 2017 годзе тэхніка наблізілася да нашых хатаў. Вядома, мы незадаволеныя, але ўжо нічога не зробіш. Свой дом з участкам гэта не кватэра ў шматпавярховым доме”.
Яшчэ ў 2013 годзе дзеля будаўніцтва новага адрэзка вуліцы Курчатава знеслі 11 будынкаў. Зараз рэшту дамоў зносяць для будаўніцтва шматпавярховага дома з шасцю пад’ездамі. Жыхары бліжэйшых шматпавярховікаў па-рознаму ставяцца да зносу старых дамоў.
“Дамы былі яшчэ добрыя, але іх вырашылі знесці і пабудаваць нешта новае. Можа гэта i да лепшага, – кажа жыхар шматпавярховага дома Валянцін. - Але нам цяжка казаць, мы не жылi ў гэтых пабудовах. Апошнія дамы былой вёскі гэта гісторыя легендарнага фільма. Не будзе гэтых дамоў і не будзе “Белых рос”. Зараз знясуць гэтыя дамы, а неўзабаве возьмуцца і за другі бок вуліцы, дзе засталося таксама тры старыя пабудовы”.
Фільм “Белыя росы” здымалі ў Гродне на тэрыторыі былой вёскі Дзевятоўка ў 1983 годзе. Праз год карціна выйшла на экраны і стала любімай у тысяч савецкіх грамадзян. Фільм і зараз часта пераглядаюць не толькі ў Гродне і Беларусі, дзе яго здымалі, але і ў іншых месцах былога Савецкага саюза.
