«Не дзеля грошай, а для супольнасці». Менеджарка Hrodna.life пра тое, як не даць замаўчаць незалежнаму медыя

Мяне завуць Марыя Кучмэйна. Я менеджарка па рэкламе Hrodna.life. Пішу гэты пост, каб папрасіць у вас дапамогі.

Я раблю тую частку працы на Hrodna.life, якую вы звычайна не бачыце. Я стараюся рабіць рэкламу такой, каб яна вам падабалася, а не прымушала як мага хутчэй закрыць сайт.

Амаль увесь жнівень я не магла працаваць напоўніцу. Пасля падзей 9 жніўня не было інтэрнэту, потым многія рэкламныя кампаніі страцілі актуальнасць на фоне імклівага развіцця падзей.

Мая праца стала незапатрабаванай. Я гледзела, як працуюць да позняй ночы мае калегі, але нічым не магла дапамагчы. Хіба што патэлефанаваць усім і спытацца, ці дома яны, або дасылаць малітвы «ў космас», каб маіх журналістаў і рэдактараў не затрымалі і не пабілі. У гэтыя дні я ні разу не пашкадавала, што працую з такімі выдатнымі людзьмі.

Чаму рэклама — гэта добра

Сродкі ад рэкламных продажаў дапамагаюць аплаціць ганарары маім калегам — журналістам. Тым, што працавалі і працуюць амаль суткамі. Калегам, якія штодня робяць сваю працу, каб вы ведалі, што адбываецца ў нашым горадзе.

Ёсць рэклама, якой мы сапраўды ганарымся. Напрыклад, вось гэтыя публікацыі:

• Правільныя пчолы жывуць на даху. Навошта ставіць вуллі ў горадзе?
• Мой дом — мой офіс. Як зрабіць прыборку, калі ўвесь час вебінары і праца
• Затэсцілі новы магазін ровараў Foxter у Гродне
• Лофты. Як завадскія руіны ператвараюцца ў сэрцы гарадоў
• Лязанкі і вярмізела. А вы ведаеце, што і як елі ў Гродне больш за 150 гадоў таму?

Яны прынеслі нам чытачоў і дазволілі зарабіць. Значыць — стварыць яшчэ больш некамерцыйных тэкстаў. Гэта сітуацыя win-win, калі задаволены і мы, і рэкламадаўцы, і чытачы. Але ва ўмовах палітычнага крызісу, (і эканамічнага, які цягнецца з канца зімы), зарабляць на рэкламе ўсё больш складана.

Мы можам дапамагчы адно аднаму

Я б з задавальненнем і зараз рабіла шмат карысных партнёрскіх праектаў. Таму прашу дапамогі ў вас.

Калі ў вас ёсць свой бізнес, нават невялікі, вы можаце падтрымаць Hrodna.life, размясціўшы ў нас сваю рэкламу. Гэта спосаб супрацы, карысны для вас і нас. А потым вы можаце параіць нас сваім сябрам і калегам, у якіх таксама ёсць уласная справа.

Я разумею, што некаторыя рэкламныя кампаніі зараз не да месца, але мы можам абмеркаваць праекты на будучыню.

Як яшчэ можна дапамагчы?

Чытайце таксама:

• «Няёмка, калі нас называюць героямі». Рэпарцёр Hrodna.life аб тым, адкуль яна бярэ сілы
• Чаго мы не можам. Галоўны рэдактар пра тое, што зрабіць, каб незалежныя медыі не замаўчалі
• «Забастовка» на Hrodna.life. Как протестуют журналисты и как поддержать независимое медиа
• «Я быў пазначаным». Руслан Кулевіч распавёў ўсё пра затрыманне, суд і цкаванне пасля «сутак»