«Сумеснымі намаганнямі, хоць і часова, але мы адцягнулі музей ад бездані», — такі пост з’явіўся на старонцы Музея гарадской гісторыі і быта 28 студзеня. Пасля публікацый аб праблемах музея, неабыякавыя людзі адклікнуліся, каб дапамагчы. У музей запрасілі групу бязвізавых турыстаў, сталі заходзіць наведвальнікі, людзі ахвяравалі грошы ў падтрымку.
[irp posts="10 179″ name="Вялiкая група бязвізавых турыстаў наведала музей Януша Парулiса"]
Каб пасля экстранай дапамогі пра музея ізноў не забылі, а Янушу не прыйшлося ісці на скрайнія меры і прадаваць частку калекцыі, мы ладзім мастацкую акцыю ў падпрымку музея.
Замяніць экспанаты калекцыі, што гаспадар меўся прадаць, можна іх малюнкамі - падумалі мы. Аматары даўніны маглі б набыць не экспанат, а яго малюнак і зрабіць тым самым дабрачынны ўнёсак ў падтрымку музея.
Першымі нашу ініцыятыву падтрымалі навучэнкі мастацкай студыі Кацярыны Забелінай, што зараз пад кіраўніцтвам мастачкі вучацца рабіць скетчы — хуткія замалёўкі.
Гэтым разам да іх «на аловак» патрапілі тры даўнія прадметы з калекцыі Януша: чайная лыжка, відэлец ды імбрык. Яны дапоўнілі нацюрморты са смакоткамі, што малявалі на занятку.
Гэтымі скетчамі мы адкрываем мастацкую галерэю экспанатаў музея Януша Паруліса.
Калі вы малюеце ці толькі вучыцеся гэта рабіць і маеце жаданне далучыцца да акцыі, пішыце ў каментах, ці на нашу рэдакцыйную паштовую скрыню — [email protected]. Януш абяцаў прадастаўляць на час экспанаты, каб мы маглі маляваць з натуры. Неўзабаве мы арганізуем майстар-клас, дзе памалюем разам штосьці з музейных цікавостак.
У выпадку, калі вам прышоўся даспадобы нейкі малюнак, і вы хочаце яго набыць, таксама паведаміце нам — звяжамся з аўтарам, каб вы маглі атрымаць малюнак і з Янушам, каб ён атрымаў ваша ахвяраванне.
