Першы ў Беларусі модны паказ з удзелам мадэляў з фізічнымі абмежаваннямі і першая дэманстрацыя дызайнерскай вопраткі для такіх людзей пройдуць у Гродне. Пытанне ўдзелу ў GrodnoFashiоnShow калекцыі адаптыўнага адзення вырашана станоўча, паведаміла 26 лютага кіраўнічка дзіцячага хоспіса Вольга Вялічка. Падтрымку дзіцячаму хоспісу аказала абласное упраўленне ідэалогіі і Офіс па правах людзей з інваліднасцю.
“Мы вельмі ўдзячны, што нас падтрымалі на такім высокім узроўні. Адчувалася шчырая зацікаўленасць людзей і разуменне праблемы, – распавяла аб перамовах у аблвыканкаме Вольга Вялічка. – Для нас удзел у фестывалі моды — важная падзея і шанец паказаць новыя магчымасці для людзей з інваліднасцю. Запрашаем паглядзець першую калекцыю адаптыўнага адзення”.
Яе меркаваннем, пазітыўнае вырашэнне пытання важна не толькі для ўдзельнікаў з абмежаванымі магчымасцямі з Гродна, але і для ўсёй Беларусі. “Прасоўванне правоў людзей з абмежаванымі магчымасцямі праз наш удзел у шоў стане значным крокам у выкананні Нацыянальнага плана па рэалізацыі Канвенцыі ААН «Аб правах людзей з інваліднасцю»”.
Лінію адзення распрацавалі Валянціна Апановіч і Вольга Вялічка. У склад калекцыі ўвайшлі мадэлі адзення для людзей на вазках, людзей з асаблівасцямі будовы цела пасля перанесеных хвароб, для сталых людзей пасля інсульту, для мадэляў з ліку пацыентаў Гродзенскага дзіцячага хоспіса. Над калекцыяй працуюць пяць швачак і адзін канструктар адзення.
