Лялечнае «спецпадраздзяленне» ДАІ 20 гадоў нясе службу ў Гродне

Насамрэч — гэта калекцыя лялек-даішнікаў былога службоўца Сяргея Каляды. За 20 гадоў калекцыянавання ў яго «спецпадраздзяленне» паступілі на службу больш за 50 лялек з розных матэрыялаў і краін.

Лялькі, меркаваннем Сяргея Каляды, дапамагаюць ствараць у службовым кабінеце добры і пазітыўны настрой. З іншага боку — яны у жартаўлівай форме паказваюць пазнавальныя чалавечыя слабасці, характэрныя не толькі для даішнікаў. Яшчэ адна каштоўная рыса калекцыі - тое, што яна дапамагае захаваць дух пэўнага часу, паказвае, як успрымалі дарожных інспектараў у розныя часы і ў розных краінах.

З Украіны сябры прывезлі некалькі даішнікаў-хабарнікаў, шаржавыя лялькі-даішнікі з Расіі часта сябруюць з бутэлькай. Літоўскі дарожны інспектар, наадварот, «як шкельца». Прычым — у самым прамым сэнсе, бо шкляны. Даішнікаў у форме бутэлек прывозілі калекцыянеру з Грузіі, бела-сініх распісных - з Гжэлі, а керамічнымі сабачкі-коцікі ды іншыя звяркі ў форме дарожных інспектараў хутчэй за ўсё былі выраблены ў Кітаі. Ёсць у каллекцыі і мясцовыя лялечныя інспектары. Самы мяккі з іх - аўтарская мяккая цацка, зробленая ў тэхніцы скульптурнага тэкстылю.

«Калекцыя пачалася вось з гэтага служакі», — Сяргей Каляда паказвае распісаную пад гжэль ляльку. Не памятаю нават, адкуль дакладна прывёз гэты сувенір. Але мне спадабалася закладзеная ўяго ідэя. З аднаго боку — гэта вельмі дабрадушны і пазітыўны міліцыянер — кветачкі на кабуры. А за спіной — пісталет і кайданкі нагатове. Тобок, ён можа пры неабходнасці сілу выкарыстаць".

Як падобнае да падобнага, першая лялька пачала прыцягваць іншых. Калегі і сябры падтрымлівалі хобі і пры нагодзе прыводзілі «на службу ў лялечнае спецпадраздзяленне» новых інспектараў.

Самае вялікае папаўненне адбылося, калі сыходзіў на пенсію намеснік начальніка ДАІ Анатоль Клімаў. «Ён таксама збіраў лялечных даішнікаў і мы жартам спаборнічала — у каго большая калекцыя. Сыходзячы на пенсію ён перадаў сваіх лялек мне. Сказаў, раз у цябе больш назбіралася, то і маіх забірай».

Хаця на службе стаўленне мае быць да ўсіх аднолькавым, ёсць у Сяргея Каляды і свой «любімчык». Гэта лялька, падараваная яму генералам Іванам Сяргеем. Даішнік слухае і ківае, а потым робіць высновы — усё як ў жыцці.

via GIPHY

«Калі будзе цікавасць да калекцыі музея ДАІ, то перадам лялек ім, каб захаваць для гісторыі», — кажа Сяргей Каляда. А пакуль хай тут «служаць». Наведвальнікам падабаецца".