У Ласосна з-за дрэнных дарог затапляе дамы. Жыхары змагаюцца з падтапленнямі самастойна, але без спецтэхнікі праблему не вырашыць. Мясцовыя ўлады пакласці асфальт не могуць — няма грошай. Hrodna.life расказвае, куды звяртацца гараджанам, каб аб праблеме пачулі.
Дамы затапляе рэгулярна, але грошай на дарогі ў бюджэце няма
У 2025 годзе ў Гродне плануюць рэканструкцыю некалькіх участкаў дарог. У тым ліку хочуць пашырыць трасу Баранавічы — Гродна, якая звязвае асноўную частку горада з мікрараёнам Ласосна.
Але ў самым прыватным сектары жыхары ўжо некалькі гадоў змагаюцца з падтапленнямі дамоў - усё з-за дрэннай дарогі.
«Дамы затаплівае рэгулярна з-за неўладкаванай дарогі. З падтапленнямі сваімі сіламі даводзіцца змагацца — з рыдлёўкай у руках. Але пры моцным дажджы гэтага не прадухіліць. Без інжынернага праекта і спецтэхнікі мы нічога не можам зрабіць», — напісала ў сацсетках жыхарка Ласосна-1.
У аблвыканкам жыхары звярталіся неаднаразова. Адказ адзін: грошай на асфальтаванне дарогі няма. «Праблема доўжыцца не год і не два. Нікому няма справы. Кіраўніцтва аблвыканкаму чорным па белым піша, што сродкаў няма».
Жыхары Ласосна: «З нашых падаткаў толькі святы арганізуюць»
У найбліжэйшыя месяцы жыхары вуліцы будуць накіроўваць новы зварот. Але надзеі на рашэнне амаль няма.
«З нашых падаткаў толькі святы арганізоўваюцца. Так і жывём многія гады з надзеяй, што наскрабуць калі-небудзь у бюджэце Гродна на належнае ўладкаванне нашай вуліцы», — заключае гродзенка.
У 2025 годзе мясцовыя ўлады ўладкоўваюць жвіровыя дарогі на 11 вуліцах мікрараёнаў з прыватнай забудовай. У будучыні жвір заменяць на асфальт.
Верагодна, дарогі прыватнага сектара Ласосна ў гэты план не ўваходзяць. Гродзенка Наталля Талочка падчас майскага стрыму са старшынёй аблвыканкама Юрыем Караевым пацікавілася, калі ў пасёлку з’явіцца асфальтаваная дарога. Жыхары Ласосна-3 скардзіліся, што ад грунтавой ідзе пыл і бруд.
«Будаўніцтва асфальтаванай дарогі ў мікрараёне Ласосна-3 у 2025 годзе не прадугледжана», — адказаў Караеў.
Па тэме: Якія пытанні аб інфраструктуры горада гродзенцы задалі Караеву?
Каранік абяцаў прывесці ў парадак дарогі ў прыватных кварталах
Жыхары Ласосна — не першыя, хто ў Гродне пакутуе з-за дрэнных дарог. У мікрараёне Лапенкі гродзенцы дабіваліся рамонту больш за 10 гадоў.
Звароты ў гарвыканкам выніку не давалі. Тады гараджане папрасілі адрамантаваць хаця б участак крыху больш за кіламетр з вуліцы Асфальтнай да Саяпіна.
У 2024 годзе гендырэктар Гродзенскай гарадской ЖКГ Міхаіл Місюла параіў жыхарам не чакаць у бліжэйшыя два-тры гады ўкладкі асфальту. Калі гродзенцы гатовыя — яны могуць звярнуцца ў «Рэмбудаўтадар» ці гарадскую ЖКГ і самі аплаціць добраўпарадкаванне дарогі, дадаў Місюля.
У лютым 2024 года Уладзімір Каранік, у той час кіраўнік вобласці, адзначаў, што аблвыканкам і гарвыканкам павінны дамовіцца аб кварталах прыватнай забудовы. Планавалася, што на працягу двух гадоў усе жвіровыя дарогі прывядуць у парадак. «Мы забяспечым адсутнасць лужын, бруду і магчымасць без шкоды для аўтамабіля пад’ехаць да дома. Далей гэтая праца будзе праводзіцца сумесна з грамадзянамі», — казаў Каранік.
Хто адказвае за рамонт дарог? Куды звяртацца, каб іх адрамантавалі?
Згодна з кодэксам «Аб архітэктурнай, горадабудаўнічай і будаўнічай дзейнасці», за рамонт дарог адказвае Міністэрства ЖКГ. У сваю чаргу мясцовыя выканкамы павінны забяспечваць стварэнне транспартнай інфраструктуры.
Таму калі гараджане накіроўваюць запыты ў абл- і гарвыканкамы — яны дзейнічаюць правільна. Каб прыцягнуць увагу мясцовых улад, праблему можна апісаць на рэспубліканскім гаспартале «115.бел» або звярнуцца ў бот «На связи».
Гродзенец Віктар хацеў, каб у адным з двароў Фолюша прыбралі дарожныя ямы. Вырашыць праблему ўдалося дзякуючы сэрвісу «Обращения.бел». Мужчына склаў заяўку. Па словах Віктара, «ужо на наступны дзень» яму патэлефанавалі з рамонтнай арганізацыі і «задалі ўдакладняючыя пытанні».
Віктар таксама апісвае схему перадачы запыту з адной інстанцыі ў іншую. Першапачаткова гродзенец звярнуўся ва УЖРЭП Кастрычніцкага раёна, затым яго запыт перадалі ў ЖЭС. Спецыялісты абследавалі двор і перадалі заяўку дарожным працоўным.
Ямы ў двары на Фолюшы адрамантавалі.
Як правільна скласці заяўку на рамонт дарогі для УЖРЭП?
У Гродне за рамонт дарог адказвае УЖРЭП раёна (Кастрычніцкага або Ленінскага), а будаўнічыя работы ў міжквартальных праездах выконвае «Рэмбудаўтадар».
У заяве для УЖРЭП гараджане павінны апісаць праблему і растлумачыць, чаму асфальтаванне дарогі неабходна. Калі адразу некалькі жыхароў просяць адрамантаваць дарогу, можна сабраць іх подпісы — тады заява будзе калектыўнай. Да ліста можна прыкласці фота дарогі.
Падобныя звароты гараджане часта падаюць па некалькі разоў. Гэта можа прымусіць чыноўнікаў вырашыць праблему, няхай і не з першага разу.
Чытайце таксама: «Хутчэй складзецца, чым яго адрамантуюць». У цэнтры Гродна людзі жывуць у доме, дзе апошні рамонт рабілі 35 гадоў таму
