Гурт «Балцкі субстрат» выступіў у краме «Лёля» 30 кастрычніка. Уладальніца крамы Дар’я Фядотава-Вановіч плануе рэгулярна праводзіць там розныя мерапрыемствы: ад выступаў музыкаў да майстар-класаў.
— Мы адпачатку ладзілі краму як прастору, дзе збіраецца і візуалізуецца ўсё цікавае, што ў нас ёсць. Працы нашых майстроў самі па сабе ствараюць культурную прастору, перадаюць пэўную атмасферу. Вядома, гэта цягне за сабой і іншыя цікавосткі культурніцкага жыцця горада, — кажа Дар’я.
Дар’я кажа, што хоча праводзіць розныя мерапрыемствы. Пэўнага аднога кірунку няма: гэта і музыка, і майстар-класы, і сустрэчы з цікавымі людзьмі. Пакуль мерапрыемствы будуць праходзіць раз на два тыдні. Але Дар’я прызнаецца, што ў яе шмат планаў.
Трэба сказаць, што памяшканне крамы і растаноўка вырабаў часам перашкаджае на мерапрыемствах.
— Памяшканне невялікае, трэба кожны раз неяк прыстасоўвацца, але гэта не шкодзіць. Дзе ёсць жаданне, з’яўляюцца і магчымасці, — усміхаецца Дар’я. — Абзавядземся лавамі ды будзем засвойваць балкон.
«Балцкі субстрат» — адны з першых гасцей, якія выступілі ў краме «Лёля». Гурт даў акустычны выступ у складзе двух чалавек: Максіма Іўкіна і Ігара Адасіка. Удзельнікі «Балцкага субстрата» называюць сябе «эксперыментальным фолкавым беларуска-балтыйскім праектам».
Гурт спяваў песні па-беларуску і па-латышску, творы на вершы беларускіх пісьменнікаў і народныя песні з уласнай аранжыроўкай. Скончылі выступ аўтарскімі блюзавымі кампазіцыямі. У будучыні гурт плануе прыехаць у Гродна поўным складам.
Калі звыклыя хобі ўжо надакучылі і больш не прыносяць задавальнення, самы час выйсці за межы…
Мастацтва тэатраў лялек у Беларусі ўзнялося надзвычай высока і 30 гадоў трымала планку якасці. Беларускіх…
«На могілках! А дзе ж яшчэ праводзіць прэзентацыю? Аўтарка кнігі пра гродзенскі праваслаўны некропаль Святлана…
У Беларусі Света выкладала хімію ў каледжы і працавала ў антыдопінгавай лабараторыі. Зараз яна жыве ў…
Гродна 100 гадоў таму праславілася як “база” серыйных забойцаў Збоньскіх. Адсюль з вуліцы Фабрычнай, 9 цягам…
Журналіст Hrodna.life Руслан Кулевіч летам 2020-га збіраўся згуляць вяселле, а да канца года - выпусціць…