Гродзенскі мастак Юзаф Ярвель 31 траўня маляваў масавы пікет на Савецкай плошчы ў Гродне. Сотні гараджан стаялі ў чарзе, каб паставіць подпісы за патэнцыйных кандыдаты ў прэзідэнты Беларусі. Свой скетч мастак гатовы прадаць, каб дапамагчы затрыманым.
Юзаф маляваў некалькі гадзін: спачатку контуры ручкай, потым дадаў колеру тушшу. Ён кажа, што не планаваў гэтага, але прайсці міма плошчы проста не змог.
«Сёння мы назіраем гістарычную падзею, — кажа Юзаф. — Гродзенцы робяць свой выбар і таму я, як мастак, вырашыў захаваць гэты момант. Я не хачу расказваць пра сябе і сваё стаўленне да палітычных падзеяў у краіне. Мая справа маляваць. Але я ведаю, што зараз адбываецца ў Беларусі, таму гатовы прадаць карціну і за атрыманыя сродкі дапамагчы палітычным вязням».
Малюнак Юзаф перадаў у краму «Адметнасць» на Кірава, 3. Уладальнік крамы Сяргей Верамеенка кажа, што ў іх ужо пачынаецца збор сродкаў на дапамогу затрыманым.
«Сёння ў нас любы ахвочы можа ахвяраваць сродкі для рэпрэсаваных у Гродне. Усе яны пойдуць на адвакатаў, перадачы і іншае.
Зараз мы шукаем кантакты родных і блізкіх Яўгена Разнічэнкі, якога затрымалі ўначы 30 траўня. Яго могуць зрабіць галоўным абвінавачаным. Просім звяртацца да нас», — распавёў Сяргей Верамеенка.
Таксама ўладальнік крамы адзначыў, што любая інфармацыя, якая тычыцца правакацыйных падзей 29 траўня на Савецкай плошчы,
будзе карысная для дапамогі затрыманым.
У Гродне затрымалі палітычных актывістаў. Увечары 29 траўня на пікеце падчас збору подпісаў за Святлану Ціханоўскую адбыўся інцыдэнт, у выніку якога блогера Сяргея Ціханоўскага і некаторых яго прыхільнікаў затрымала міліцыя. Сярод затрыманых — сябра ініцыятыўнай групы Дзмітрый Фурманаў. Удзельніцу верагоднай правакацыі супраць Ціханоўскага апазналі ў сацсетках.
Затрыманні працягнуліся на наступны дзень. 30 траўня затрымалі актывіста Мікалая Саляніка, які днём раней вёў перамовы з кіраўніцтвам міліцыі і спрабаваў даведацца, за што быў затрыманы і дзе знаходзіцца Ціханоўскі. Праваабарончы цэнтр «Вясна» склаў спіс затрыманых у Гродне. Частку з іх перавезлі ў Мінск.
Гэта не спыніла ініцыятыўную групу Ціханоўскай. Афіцыйна было заяўлена, што падчас інцыдэнту пацярпеў міліцыянт. Узбуджаная крымінальная справа па факце гвалту ў адносінах да супрацоўнікаў органаў унутраных справаў. Нягледзячы на гэта, на наступныя дні да пікету Святланы Ціханоўскай выстраіліся чэргі — людзі стаялі, каб аддаць подпіс, нават пад дажджом.
Праваабаронцы прызналі Сяргея Ціханоўскага і іншых затрыманых у Гродне палітычнымі вязьнямі.
У выніку пад удар патрапілі і выпадковыя людзі. Увечары 29 траўня ў сацсетках пачалося цкаванне выпадковага чалавека, якога прынялі за супрацоўніка органаў у цывільным, які ўдзельнічаў у затрыманні ў Гродне. У дзяржаўных СМІ з другога боку пачалося цкаванне 81-гадовай пенсіянеркі Галіны Філіпаўны, якая падчас стрыму з Савецкай плошчы выказалася супраць Лукашэнкі і ў падтрымку Ціханоўскіх. Пенсіянерку Станіславу Дамшэль, якая 29 траўня таксама была на Савецкай, абвінавацілі ў дробным хуліганстве, але яна не пусціла міліцыю да сябе дадому. Выпадковыя людзі былі і сярод затрыманых на плошчы.
У міжваенны час Гродна набыло незвычайную славу. Горад стаў месцам прыцягнення незвычайных турыстаў - тых,…
Ці хапае ў цэнтры Гродна прадуктовых крам? Спрэчкі наконт гэтага выклікала адкрыццё на перакрыжаванні Савецкай…
Прыбраныя ялінкі, свечкі, навагоднія вянкі і гірлянды, аксаміт, светлы ці цёмны фон на выбар. Гродзенскія…
Улады стварылі новую платформу “меркаванне.бел”. Яе пазіцыянуюць як анлайн-пляцоўку, на якой кожны зможа ў вольнай…
Калекцыя адзення гродзенкі Кацярыны Карлацяну дэбютавала гэтай восенню на Парыжскім тыдні моды. А пачыналася ўсё…
Гродзенец Раман Нагула амаль паўжыцця працуе з дрэвам. Школьнікам ён пачынаў з бейсбольных біт, а…