У няпростай сітуацыі апынуўся ўладальнік гродзенскага хостэла «Сарматыя». З чэрвеня гэтага года ён судзіцца з землеўпарадкавальнай службай гарвыканкама. Спрэчным пытаннем стала добраўпарадкаванне суседняй тэрыторыі. Hrodna.life выслухаў меркаванні ўладальніка хостэла і гарадской службы.
Усё рабілі для гасцей горада
Хостэл «Сарматыя» адкрыўся ў цэнтры Гродна ў снежні 2017 года і за 9 месяцаў працы прыняў у сябе каля 1000 наведвальнікаў з розных краін. Праўда, з гарадскімі службамі справы не заладзіліся. З чэрвеня ў хостэла пачаліся праблемы з землеўпарадкавальнай службай з-за добраўпарадкавання тэрыторыі.
«Пры будаўніцтве хостэла аддзел архітэктуры Гродзенскага гарвыканкама абавязаў нас добраўпарадкаваць дваровую тэрыторыю. Мы гэта зрабілі, — распавядае ўладальніца хостэла Марыя Дзарахохава. — За свае грошы паклалі тратуарную плітку, уладкавалі парковачныя месцы, тратуарную зону і азеляненне ў адпаведнасці з патрабаваннямі ўпраўлення архітэктуры, аховы навакольнага асяроддзя і міністэрства культуры. Паставілі некалькі дэкаратыўных элементаў, зрабілі адвод ліўневых сцёкаў - усё каб захаваць будынак як гісторыка-архітэктурную каштоўнасць. Рабілі гэта не для сябе, а для кліентаў хостэла — гасцей нашага горада».
Аднойчы ў хостел прыйшлі супрацоўнікі землеўпарадкавальнай службы і папрасілі прыбраць некалькі элементаў з тэрыторыі. Уладальнікі адмовіліся, спасылаючыся на тое, што нішто нікому не замінае праходзіць побач.
https://www.instagram.com/p/Bjl7IKQhTp9/?taken-by=hostelsarmatia
Навошта парадкавалі?
Уладальнік хостэла распавядае, што яшчэ ў жніўні 2017 году старшыня Гродзенскага гарвыканкама Мечыслаў Гой зацвердзіў акт выбару гэтага зямельнага ўчастка з мэтавым прызначэннем «для добраўпарадкавання тэрыторыі пад хостэл». Але ўпраўленне землеўпарадкавання гарвыканкама ў судовым парадку прызнала гэтую тэрыторыю зямлёй агульнага карыстання, фактычна забраўшы яе ў хостэла.
«Суд даў нам штраф 20 базавых і запатрабаваў дэмантаваць кветкавыя вазоны. Я выканала ўказанне суда. Але землеўпарадкавальнай службе гэтага аказалася мала і цяпер яны патрабуюць спагнаць з нас зямельны падатак за гэты ўчастак у 10-кратным памеры. А гэта яшчэ каля 2000 рублёў».
Марыя кажа, што да іх там было проста балота. Узнікае пытанне: навошта яны рабілі добраўпарадкаванне двара, калі за гэта яшчэ і караюць.
«Пачнецца хаос»
У землеўпарадкавальнай службе расказалі Hrodna.life, што ўладальнік хостэла самавольна заняў зямельны ўчастак, дапусціў там будаўніцтва інжынернай сеткі, за што і будзе пакараны як за адміністрацыйнае парушэнне.
«У дзеянні ўладальнікаў хостэла некалькі правапарушэнняў, — распавядае начальнік землеўпарадкавальнай службы Гродзенскага гарвыканкама Андрэй Кухцюк. — Спачатку грамадзянка Дзарахохава прапанавала каля хостэла на землях агульнага карыстання зрабіць добраўпарадкаванне. У выніку атрымалася так, што каля ўваходнай групы была ўстаноўлена агароджа, з’явіліся столікі, пляцоўка для ровараў, брамка, якая перашкаджае доступу. Адзін з суседзяў хостэла пачаў пісаць скаргі ў гарвыканкам: на якой падставе Дзарахохава робіць добраўпарадкаванне і перашкаджае свабоднаму праходу.
Другі момант звязаны з паркоўкай для аўтамабіляў, дзе былі ўсталяваныя прылады для замыкання. У ДАІ сказалі, што на гэта дазвол не давалі. Акрамя гэтага на тэрыторыі з парушэннямі былі пракладзены інжынерныя камунікацыі, без дазволаў. Калі кожны пачне рабіць усё што яму захочацца — пачнецца сапраўдны хаос".
«Уладальнік хостэла адмовіўся гэта рабіць і мы пачалі дзейнічаць у рамках заканадаўства. У выніку ўсё дайшло да суду, а пасля гэтага тэрыторыяй зацікавілася і падатковая, якая налічыла суму за самавольна заняты ўчастак», — дадаў Андрэй Кухцюк.
«Горад нам павінен быць удзячны»
Марыя Дзарахохова засмучаная, што на працягу трох месяцаў ім ніхто не хоча дапамагчы. Пісала яна і старшыні гарвыканкама Мечыславу Гою, які некалькі разоў казаў, што Гродна зацікаўлены ва ўстановах гасцінічнага тыпу.
«У хостел і добраўпарадкаванне тэрыторыі мы ўклалі вялікія грошы. лічылі, што горад яшчэ павінен быць нам удзячны за працу. А па выніку сёння проста няма да каго звярнуцца. Твар горада пачынаецца з вокнаў гасцініц і хостэлаў, а ўжо потым усё астатняе. Цяпер у нас зямлю забіраюць, а потым скажуць яшчэ і велапаркоўкі прыбраць. Ніхто не думае аб сутнасці, а толькі думаюць як пакараць».
