Дзед Мароз прыйшоў праз акно: у Гродне прамысловы альпініст прыносіць дзецям казку

Раней Дзед Мароз прыходзіў дадому як усе — праз дзверы. Цяпер ён можа залезці ў акно, незалежна ад таго, на якім вы паверсе жывеце. Новую паслугу прапануе гродзенец Арцём, які працуе прамысловым альпіністам.

Разам з Арцёмам Hrodna.life прыехаў на першы выклік у гэтым годзе. На Вiшняўцы Дзед Мароз павінен быў павіншаваць траіх дзяцей, якія нічога не падазравалі.

Бацькі тым часам сустракаюць Арцёма і яго кампанію каля дома, праводзяць на дах і ідуць дадому да дзяцей. Дзед Мароз за 10 хвілін рыхтуе свой рыштунак для спуску ў кватэру на 9-м паверсе. У Арцёма з гэтым праблем няма — апошнім часам ён шмат працаваў і спускаўся з вышыні не раз. Галоўнае, каб у доме ў заказчыка быў прыдатны дах — роўны, як у панэльных дамах. Трэба, каб на даху было нешта, да чаго можна прымацавацца. Усё астатняе — справа тэхнікі. Вяроўкі дзве — на адной Дзед Мароз спускаецца, другая — страховачная.

«Сёння нашы дзеці перастаюць верыць у Дзеда Мароза. Чаму б ім не падарыць казку? — распавядае Арцём. — Зімой працы ў прамысловых альпіністаў няма, мне даводзілася шукаць нешта новае, вось і паспрабаваў сябе ў незвычайнай ролі».

Пакуль Дзед Мароз спускаецца з даху, дзяцей у кватэры забаўляюць Снягурка і фокуснік. А потым яны разам клічуць Дзеда Мароза: казачны персанаж эфектна з’яўляецца ў акне i грукае. Дзеці ў адказ цешацца як тыя вар’яты.

Арцём залазіць у акно і знаёміцца ​​з дзецьмі. Пасля вершаў ён дарыць падарункі. Маленькія гродзенцы не проста задаволеныя — яны зноў пачынаюць верыць у казку.

«Гэта віншаванне ад Дзеда Мароза наша сям’я выйграла ў розыгрышы ў Вконтакте, — распавядае мама Дар’я. — У мінулым годзе мой сын на ранішніку ў садку казаў, што не верыць у Дзеда Мароза, але пасля таго, як да яго спусціўся Арцём, я думаю, меркаванне зменіцца».

Сыходзіць Дзед Мароз праз дзверы разам са Снягуркай, каб не паказваць альпінісцкага рыштунку і не расчароўваць дзяцей.

«Першы спуск прайшоў удала, усе засталіся задаволеныя, нават тыя людзі, якія мяне ўпусцілі да сябе праз акно на іншым паверсе».

Арцём і яго каманда плануе віншаваць гродзенцаў да сярэдзіны студзеня. Знайсці хлопца можна ў адмысловай групе ў Вконтакте. Візіт Дзеда Мароза праз акно будзе каштаваць каля 100 рублёў.