«Я электрык і яшчэ зусім нядаўна працавала на Гродзенскай мытні. Шмат хто прыходзіў на мяне паглядзець як на нешта незвычайнае і новае», — так сябе рэкламавала членам журы 22-гадовая Анастасія на абласным этапе кастынгу нацыянальнага конкурсу «Міс Беларусь — 2018», які праходзіў у Гродне 4 лютага. Журы прагледзелі больш за 80 дзяўчат, з якіх 30 выбралі ў наступны этап.
Штогадовыя пошукі самай прыгожай беларускі па версіі Мінкульта, АНТ і Нацыянальнай школы прыгажосці праходзілі ў Гродне ў Каледжы мастацтваў. На сцэне перад членамі журы дзяўчынам трэба было прадэманстраваць не толькі знешнюю прыгажосць, але і ўнутраную. Дзяўчаты з розных гарадоў вобласці дэфілявалі, спявалі, танцавалі і дарылі падарункі членам журы.
Беларуская тэлевядучая Люцыя Герашчанка (Лушчык) родам з Ліды і з вялікім задавальненнем прыехала ў Гродна з членамі журы, бо ведала, што ў гэтым горадзе кастынг будзе асаблівы. Перад кастынгам яна пагутарыла з дзяўчатамі.
«Я ведаю, што ў Гродзенскай вобласці прыгажосць асаблівая. Тут дзяўчаты з унутраным стрыжнем і вялікай годнасцю. Таму мне было прыемна прыехаць у Гродна на кастынг, які, можна сказаць, праходзіў на роднай зямлі, — распавядае Люся. — Ад Гродна мае ўражанні вельмі станоўчыя. Гэты горад апраўдаў мае чаканні - я чамусьці думала, што тут будзе шмат прыгожых дзяўчат. І гэта не толькі маё меркаванне, як госця, але і іншых членаў журы».
З яе словаў, некаторыя дзяўчаты былі гатовыя адразу з кастынгу ісці на вялікую сцэну. Маўляў, мясцовыя прыгажуні матывуюць, каб больш за сабой сачыць і шырэй усміхацца.
Пакуль дзяўчаты выступалі перад членамі журы, у фае іх чакалі хлопцы і бацькі. Сярод іх быў і Валерый, які прымусіў сваю дзяўчыну пайсці на кастынг.
«Карына мая — прыгожая, баялася да апошняга ісці на кастынг, але я яе падтрымаў. Даў пiнка спачатку, а далей яна сама ўзялася за справу. Яна рыхтавалася да кастынгу, але, напэўна, не так як усе: яна на працягу двух дзён рабіла з паперы букет для членаў журы. У працоўны час такі букет робіцца цэлы тыдзень».Сама 18-гадовая Карына Хахлова, студэнтка ГрДУ, здолела прайсцi кастынг у Гродне.
«Рада, што прайшла. Раней я спрабавала свае сілы ў „Міс ГрДУ“, так што нейкі досвед у мяне ёсць. Самае страшнае для мяне было гэта першы этап — прадстаўленне. Кожная дзяўчына баіцца, каб ёй не задалі каверзнае пытанне».
Члены журы папрасілі Карыну пагутарыць з імі на англійскай мове. Дзяўчына зрабіла гэта без праблем, бо вучыцца на філолага.
«Я вывучаю англійскую філалогію, так што мову ведаю», — дадала Карына.
На кастынг прыехала шмат дзяўчат з розных гарадоў вобласці. Многія не хвалююцца, што не прайшлі далей, бо для іх гэта быў першы падобны вопыт.
«Хвалявацца не бачу сэнсу, бо за гэтыя некалькі гадзін адбору я атрымала шмат вопыту і пазнаёмілася з цікавымі дзяўчатамі. Досвед буду выкарыстоўваць у наступных кастынгах», — распавяла 20-гадовая Таццяна з Гродна.
Сярод 80 удзельніц члены журы адабралі 30 чалавек. Пасля таго, як каманда журы праедзе ўсе абласныя гарады, удзельніц прааналізуюць па відэа і фота. Найлепшых запросяць на чарговы адбор у Мінск, а ўжо адтуль самыя лепшыя адправяцца ў фінал.
Калі звыклыя хобі ўжо надакучылі і больш не прыносяць задавальнення, самы час выйсці за межы…
Мастацтва тэатраў лялек у Беларусі ўзнялося надзвычай высока і 30 гадоў трымала планку якасці. Беларускіх…
«На могілках! А дзе ж яшчэ праводзіць прэзентацыю? Аўтарка кнігі пра гродзенскі праваслаўны некропаль Святлана…
У Беларусі Света выкладала хімію ў каледжы і працавала ў антыдопінгавай лабараторыі. Зараз яна жыве ў…
Гродна 100 гадоў таму праславілася як “база” серыйных забойцаў Збоньскіх. Адсюль з вуліцы Фабрычнай, 9 цягам…
Журналіст Hrodna.life Руслан Кулевіч летам 2020-га збіраўся згуляць вяселле, а да канца года - выпусціць…