Адкрывае бізнес, сутыкаецца з дыскрымінацыяй, дапамагае бежанцам: што можна даведацца пра беларусаў у Польшчы з загалоўкаў навін?

Рэпрэсіі, вайна, пагаршэнне фінансавага становішча — усё гэта змушае беларусаў і беларусак эміграваць у іншыя краіны. Часцей за ўсё для новага дома выбіраюць Польшчу, Літву, Латвію, Грузію. Да пачатку вайны ў топе была і Украіна. Hrodna.life паспрабаваў зразумець, як будуць выглядаць тыповыя беларус і беларуска, калі сабраць іх партрэт паводле загалоўкаў СМІ. Вось якія беларусы ў Польшчы ў нас атрымаліся.

У Польшчы беларусы застаюцца другі па колькасці групай замежнікаў. Паводле звестак польскага ўпраўлення па справах замежнікаў, восенню 2022 легальна ў Польшчы жыло 59 327 беларусаў.

Адкрывае бізнес

Беларус у Польшчы адкрывае розны бізнэс: ад СТА да б’юці-каворкінга. Часта ў сферу інтарэсаў беларуса ўваходзіць галіна транспарту і лагістыкі. За некалькі гадоў у Польшчы беларус перавёз IT-бізнес, адкрыў канцэптуальныя бары. Не заўсёды беларус пачынае сваю справу з нуля, часам ён купляе гатовы бізнэс, напрыклад, піцэрыю. Адкрыць у Польшчы беларус можа не толькі бізнэс, але і царкву.

Сустракаецца з праблемамі, але адстойвае свае правы

Часам беларус сутыкаецца з дыскрымінацыяй. Напрыклад, спартсменку не дапусцілі да спаборніцтваў праз беларускі пашпарт, а невядомыя забралі дакумент у беларуса і запатрабавалі грошы за яго вяртанне.

Пасля абвяшчэння мабілізацыі ў Расіі цікавасць беларуса да працы ў Польшчы вырасла на 70%. Але са знаходжаннем у краіне ў яго здараюцца праблемы — беларусу адмаўлялі ў выдачы візы ў Польшчы ці не пускалі у краіну праз нямэтавае выкарыстанне візы.

Беларус хоча і ў Польшчы навучаць дзяцей на роднай мове, таму падае заяву на адкрыццё беларускамоўных класаў у школах.

Ідзе пад суд і сустракаецца з прэзідэнтам

Беларуса ў Польшчы абвінавацілі ў антыўкраінскіх правакацыях, судзілі за тое, што ён задушыў украінца пры самаабароне або незаконна перасёк мяжу, уцякаючы ад магчымых рэпрэсій. Беларуса затрымалі паводле падазрэння ў арганізацыі незаконнай міграцыі. А яшчэ беларус выпаў з вакна шматпавярховіка.

Беларус прымае ўдзел і ў грамадскім жыцці Польшчы. З ім нават сустракаецца прэзідэнт Польшчы Анджэй Дуда. У Польшчы беларускі праходзяць ваенную падрыхтоўку, рыхтуюцца супрацьстаяць беларускаму рэжыму і запісваюцца ў харугвы.

Дапамагае іншым

Ёсць беларусы, якія імкнуцца дапамагаць іншым людзям, якія з’ехалі. Напрыклад, у Варшаве беларус адткрыў агенцтва нерухомасці, каб палегчыць пошук жылля. Беларуска зняла дом і прымае ў ім украінскіх і беларускіх уцекачоў, дапамагае ў чатах і падтрымлівае тых, хто з’ехаў. З самага пачатку вайны ва Украіне беларус-валанцёр дамагаў украінскім уцекачам.

Для параўнання: пачытайце нашы матэрыялы 2016 года, дзе мы спрабавалі зразумець тыповага гродзенца і тыповую гродзенку — героеў навінавых загалоўкаў.