Да Міжнароднага жаночага дня мы склалі чарговы спіс з васьмі гродзенак, якія не толькі радуюць свет сваёй прыгажосцю, але і змяняюць яго да лепшага. Першы такі спіс мы складалі два гады таму – паглядзіце і параўнайце.
Алена Шчасная
Архітэктарка, навуковая кіраўнічка праектаў рэканструкцыі храмавай архітэктуры. Пад яе кіраўніцтвам праходзіла аднаўленне Каложскай царквы, драўлянага лямуса, архіерэйскага панадворка. Дзякуючы яе працы гістарычная архітэктура Гродна і Гродзеншчыны мае шанец на якаснае захаванне: турыстам будзе на што паглядзець, а спецыялістам ад архітэктуры – пераняць станоўчы досвед.
Чытайце таксама: Алена Шчасная: “Я – архітэктар па жыцці”
Вольга Гаўрылік
Адзіная ў Беларусі мядовы самелье жыве ў Гродне і робіць наша жыццё больш салодкім. Таксама Вольга цікавіцца рознымі экалагічна-урбаністычнымі навінкамі, звязанымі з гарадскім пчалярствам. Спадзяёмся, што яе ініцыятывы знойдуць магчымасці для рэалізацыі ў нашым горадзе.
Чытайце таксама: Вольга Гаўрылік: “Я – пчолка, што шукае нектар, але ўмее джаліць”
Вольга Вялічка
Кіраўнічка дзіцячага хоспіса. Дзякуючы працы Вольгі і яе каляжанак дапамогу атрымліваюць не толькі невылечна хворыя дзеці, але і сем’і, дзе яны гадуюцца. Дзіцячы хоспіс стаў месцам прыцягнення супольнасці і паўнавартасным арганізатарам шматлікіх культурніцкіх ініцыятываў.
Чытайце таксама: Вольга Вялічка: “За 10 гадоў кіравання хоспісам я навучылася ўсяму”
Ірына Варкулевіч
Дызайнерка і куратарка выставаў. Намаганнямі Ірыны ў горадзе ўзнікла ініцыятыва “Галерэі, якіх няма”. У віртуальнай прасторы гэтых галерэй можна пабачыць працы гродзенскіх мастакоў. Таксама Ірына арганізоўвала выставы ў будаўнічай краме ды інсталяцыі ў гарадской прасторы.
Чытайце таксама: У Гродне з’явілася пано, прысвечанае Кастусю Каліноўскаму
Кацярына Гардзеева
Фатографка, што вельмі беражна і шчымліва захоўвае бачанне горада і яго жыхароў. Яе фотаздымкі дапамагаюць не проста пабачыць, але сэрцам адчуць пульс жыцця Гродна.
Чытай больш: Видеть кадр – это ремесло
Юлія Мінчанка
Званарка Свята-Пакроўскага кафедральнага сабора. Звонам ад Юліі адзначаны не толькі рэлігійныя падзеі ды святы. Гукі перазвону ў яе выкананні сталі часткай шматлікіх гарадскіх імпрэзаў і сапраўднай гукавай візіткай Гродна.
Чытайце таксама: Юлія Мінчанка: “Я гляджу на жыццё са сваёй званіцы”
Наталля Наземцава
Бібліятэкарка. Намаганнямі Наталлі і яе калегаў у Гродне сталі ствараць “Цёплыя кніжкі” для дзяцей, што не бачаць. Бібліятэкі Гродна сталі месцам, дзе праходзяць тэатралізаваныя пастаноўкі, сустрэчы гістарычных клубаў, канцэрты бардаў, кніжныя фрымаркеты і шмат іншых цікавых імпрэзаў.
Чытай больш: Калі не можаш падзяліцца зрокам. Як гродзенскія школьнікі ствараюць кнігі для невідушчых дзяцей
Эмілія Комар
Вядучая курсаў “Мова Нанова”. Эмілія ведае, як зацікавіць беларускай мовай і культурай самых розных людзей. Праз яе працу па-беларуску гавораць штогод больш людзей, а мова аматараў беларускасці робіцца больш граматнай і прыгожай.
