Унікальная знаходка: два старых фота распавядаюць гісторыю аднаго моста ў Гродне

У Гродне, каля Парку высокіх тэхналогій, ёсць адно прыгожае і ціхае месца са старым мостам. Яго гісторыю ведаюць нямногія. Да нядаўняга часу інфармацыю пра канструкцыю было складана знайсці, а старых фота гісторыкі і краязнаўцы наогул не бачылі. Гродзенка Анастасія Мінючыц паказала Hrodna.life унікальныя здымкі гэтага моста, якія доўгі час знаходзіліся ў Санкт-Пецярбургу.

Гродзенскія краязнаўцы і гісторыкі лічаць, што мост праз ручай Юрыздыка пачалі будаваць у канцы 19 стагоддзя, калі на гэтым месцы пачалося будаўніцтва губернскай акруговай бальніцы. Увялі ў эксплуатацыю мост у 1913 годзе. Ён перанёс дзве сусветныя вайны і цудам ацалеў ад бамбёжак. Таму гэта сёння адзін з самых старых мастоў у горадзе.

Сам мост невялікі - каля 40 метраў даўжынёй. Доўгія гады гараджане па ім хадзіць не маглі - тэрыторыя была закрытая. У 2016 годзе пасля рэканструкцыі праход адкрылі. Мост стаў выключна пешаходным, побач з ім уладкавалі зялёную зону.

Падобную карціну мы можам назіраць і на амаль стогадовых фотаздымках, якія прадаставіла Анастасія Мінючыц. Хто на здымку, дзяўчына не ведае, але месца на фота здолела вызначыць хутка. Мост якраз знаходзіцца недалёка ад яе сямейнага дома па вуліцы Міцкевіча.

«Гэтыя два фотаздымкі належалі маёй прабабулі Яўгеніі Мінючыц-Міссек. Пасля яе смерці прыёмная дачка забрала фотаздымкі ў Санкт-Пецярбург. І толькі ў 2010 годзе яна іх прывезла назад. Праз 8 гадоў я ўспомніла пра гэтыя старыя карткі і вырашыла іх паказаць. Сама прабабуля жыла на Рэйманта, а яе брат, мой прадзед, на Міцкевіча».

Фотаздымкі, якія прадставіла Анастасія, унікальныя, бо ў горадзе няма зусім здымкаў з гэтым мостам. На зваротным баку подпіс — 28.08.1921 года.

Гісторык Андрэй Вашкевіч адзначыў, што інфармацыі па старым мосце ў маляўнічай даліне мала, а фатаграфій раней ён наогул не бачыў. Тое, што здымкі знайшліся, гэта вялікі плюс для гісторыі горада.

Дарэчы, у Анастасіі вялікі сямейны фотаархіў, якому ўжо больш за 100 гадоў. Магчыма, у будучыні дзяўчына знойдзе яшчэ каштоўныя здымкі для гісторыі горада.