Ноч музеяў у беларускіх установах пройдзе з 14 да 16 траўня. Hrodna.life расказвае, якую праграму запланавалі ў Гродзенскай вобласці.
Ноч музеяў у Гродне і вобласці ў траўні 2026
Ноч музеяў – акцыя, якая праходзіць у розных краінах свету. Мерапрыемствы, як правіла, праводзяць у другой палове дня або ўвечары – падчас іх наведвальнікі глядзяць на звыклую экспазіцыю пад новым ракурсам. Супрацоўнікі музеяў ладзяць майстар-класы, квэсты, воркшопы, запрашаюць музыкаў, акцёраў і пісьменнікаў.
Гродна
Гродзенскі дзяржаўны гісторыка-археалагічны музей (вул. Замкавая, 20).
У музеі запланавалі праграму “Магія Шэкспіра”. Наведвальнікаў запрашаюць “пагрузіцца ў свет фей і эльфаў”. Таксама прапануюць прыбрацца ў тэматычныя касцюмы.
Праграма пачнецца ў 19:30. Кошт квітка для дарослых – 35 руб., для школьнікаў – 20 руб.
Ліда
Лідскі гісторыка-мастацкі музей (вул. Перамогі, 37а).
Праграма ў Лідскім музеі называецца “Квасныя гісторыі”. Запланавана дэгустацыя квасу, “настальгіраванне пад газіроўку і знаёмства з біяграфіяй Чабурашкі”, а таксама выстава адной карціны.
Акцыя пройдзе 15 траўня а 18:00. Уваходны білет дарослым абыдзецца ў 7,10 руб., школьнікам – у 2,7 руб.
Лідскі замак (вул. Замкавая, 1).
Мерапрыемствы пройдуць у вежах замка. Наведвальнікам прапануюць разгадаць крыжаванку Гедыміна, прысвяціцца ў каралёў і зрабіць здымкі каля сярэднявечнай фотазоны. Завершыцца акцыя экскурсіяй па вячэрняй Лідзе.
Мерапрыемства правядуць 16 траўня, пачатак а 19:00. Дарослыя аддадуць за білет 15 руб., школьнікі – 8 руб.
Ваўкавыск
Ваўкавыскі ваенна-гістарычны музей (вул. Баграціёна, 10).
Гараджанам прапануюць паўдзельнічаць у квэст-гульні з дэтэктыўным сюжэтам і разгадаць “загадкавае знікненне экспаната”.
Квэст запланаваны на 16 траўня ў 18:00. Уваход – 5 руб., аплата толькі наяўнымі.
Мір
Замкавы комплекс «Мір» (вул. Чырвонаармейская, 2).
Да Ночы музеяў у Міры арганізуюць мерапрыемствы, якія перанясуць гасцей у эпоху Сярэднявечча і Рэнесансу. Будзе дэфіле гістарычных касцюмаў, майстар-класы, батлеечны спектакль і фотавыстава.
Падзея пройдзе 16 траўня, пачатак у 11.30. Уваход – па квітках у музей.
Астравец
Астравецкі гісторыка-этнаграфічны музей (пр-т Энергетыкаў, 2).
У музеі даследуюць “Жаночы код”. Будзе “подыум жаночых гісторый”, музейныя сустрэчы, інтэрактыўныя зоны і майстар-класы.
Акцыю правядуць 15 траўня, уваход – вольны (акрамя майстар-класа па маляванні акварэллю).
Навагрудак
Дом-музей Адама Міцкевіча (вул. Леніна, 1).
Гасцей акунуць у атмасферу літаратурнага кафэ. Абяцаюць эстэтыку XIX стагоддзя, шпацыр па залах музея з тэатралізаванымі элементамі, а таксама навучанне мастацтву «таемнай перапіскі» з дапамогай веера.
Літаратурнае кафэ будзе працаваць 16 траўня з 18:00. Уваход вольны.
Дзятлава
Дзятлаўскі гісторыка-краязнаўчы музей (вул. Першамайская, 12).
У праграме Ночы музеяў – спаборніцтвы па стральбе з лука, майстар-клас па працы з палімернай глінай, прагляд фільма і сустрэча з Радзівілам.
Акцыя пройдзе 16 траўня, пачатак а 11:00.
Карэлічы
Карэліцкі краязнаўчы музей (вул. Савецкая, 19).
Да Ночы музеяў у Карэлічах адкрыюць персанальную выставу мастака Паўла Абадзінскага, правядуць майстар-класы па маляванні, выцінанцы і танцах. Для дзяцей – гульнявая пляцоўка і тэатр ценяў.
Мерапрыемства пройдзе 14 траўня, пачатак а 15:00. Уваход вольны.
Вялікая Бераставіца
Музей вавёркі ў Вялікай Бераставіцы (вул. Савецкая, 17).
Музей вавёркі ў Вялікай Бераставіцы (вул. Савецкая, 17).
У музеі зладзяць квэст – прапануюць разгадаць таямніцы музейнага дворыка, а таксама правядуць краязнаўчае падарожжа ў мінулае.
Мерапрыемства пройдзе 15 траўня, пачатак а 17:00. Уваход вольны.
Ашмяны
Ашмянскі краязнаўчы музей (вул. Савецкая, 128).
Мерапрыемствы ў музеі прысвяцяць 685-годдзю Ашмянаў – пагрузяць у гісторыю горада. Запланаваны пленэр, тэатр ценяў і інтэрактыўная экскурсія. Завершаць Ноч музеяў рэтра-вечарынкай.
Мерапрыемствы пройдуць 15 траўня, пачатак а 11.00. Уваход вольны.
