Bro Car («Брокар») плануе адкрыццё яшчэ ў некалькіх гарадах Гродзенскай вобласці – у хуткім часе сэрвіс прыйдзе ў Ліду, а пасля ў Ваўкавыск. Таксама думаюць аб запуску ў Віцебску. А Мінск будзе адным з апошніх гарадоў, дзе сервіс пачне працу, піша «АвтоГродно».
Вадзіцеляў для Bro Car усё яшчэ не хапае
У Беларусі Гродна стаў першым горадам, дзе з’явіліся Bro Car – гэта адбылося ў сярэдзіне студзеня 2026. Тады пасажыры скардзіліся, што нягледзячы на працуючы дадатак замовіць машыну не атрымліваецца – не хапае кіроўцаў і свабодных аўто.
Праз два з паловай месяцы працы сэрвісу дырэктар па развіцці Аляксей Маркін адзначыў, што “ідзе спаборніцтва за перавозчыка, а не за пасажыра”. Каб прыцягнуць кіроўцаў, якіх па-ранейшаму не хапае, сэрвіс дазволіць супрацоўнікам працаваць на некалькі дыспетчарскіх службаў. Пакуль, па словах Маркіна, кіроўцы Bro Car у Гродне здзяйсняюць па 150-200 заказаў у дзень.
Bro Car у Беларусі кіруе былы дырэктар таксі “Максім”
Аляксей Маркін – дырэктар па развіцці сэрвісу таксі «Максім», які ў сакавіку 2025 выключылі з Рэестра аўтамабільных перавозак. Гэта было першае выключэнне дыспетчара таксі з рэестра – яны парушылі заканадаўства краіны.
Прычынай паслужылі шматлікія факты перадачы заказаў вадзіцелям-нелегалам, гэта значыць асобам, якія не зарэгістраваны ў якасці ІП і не знаходзяцца ў штаце якіх-небудзь аўтамабільных перавозчыкаў. У выніку пасажырам прадастаўлялі небяспечныя паслугі, а падаткі з выручкі ў бюджэт не паступалі.
Таксама ад нядобрасумленнай канкурэнцыі пакутавалі легальныя дыспетчарскія службы і аўтамабільныя перавозчыкі, якіх нелегалы ў літаральным сэнсе абкрадалі, пісаў у той час smartpress.by. Сам сэрвіс быў не згодзен з рашэннем.
Цяпер, адзначае Маркін, праца Bro Car вядзецца ў “цалкам легальным полі”. Каб дабіцца гэтага, сэрвіс заключыў дамоўленасці з дзяржаўнай Асацыяцыяй прафесійных перавозчыкаў.
Пасажыры могуць “зацікавіць” кіроўцу
Асаблівасць Bro Car – фіксаваныя тарыфы. У гадзіны пік прадугледжана асобная тарыфная сетка. Паводле слоў Маркіна, важна вытрымаць баланс, каб паездка была выгадная і кіроўцам, і пасажырам. Каб павысіць цікавасць кіроўцы да сваёй замовы, пасажыр можа самастойна павялічыць суму на 1-2 руб.
Bro Car – казахстанскі агрэгатар таксі, які таксама працуе ў Азербайджане. Першы філіял беларускага сервісу адкрылі ў Віцебскай вобласці летам 2025, але запуск у выніку быў у Гродне.
Чытайце таксама: У Гродне з’явіўся новы сэрвіс таксі
