Праект дабраўпарадкавання вуліцы Праванабярэжнай выйшаў на фінальную стадыю. Старт работ чакаецца ў бліжэйшы час. Рэканструкцыя пачнецца з прылеглай вуліцы Рыбацкай, а падрадчыкаў выберуць адразу пасля завяршэння праектавання і праходжання экспертызы.
Генеральным заказчыкам работ прызначаны УКБ аблвыканкама. Паводле слоў генеральнага дырэктара Дзмітрыя Валкавіча, праект распрацоўвае творчы калектыў архітэктараў інстытута «Гроднаграмадзянпраект», паведамляе сайт proregion24.by.
Спецыялісты ўжо прыступілі да абследавання аснавання Каложскай царквы. У ходзе работ выявілі старадаўнія ўмацаванні — драўляныя палі, што ўлічваецца ў праектных рашэннях.
Пераўтварэнні закрануць не толькі саму набярэжную, але і аб’екты на Нёмане. У рэалізацыі праекта ўдзельнічаюць інвестары рэканструкцыі былога піўзавода: выхад з гістарычнага комплексу будынкаў да набярэжнай стане адным з архітэктурных акцэнтаў.
Таксама распрацоўваецца праект працягу сквера на левым баку вуліцы Дарвіна ў бок басейна «Лазурны». На гэтай тэрыторыі плануецца ўладкаванне спартыўнай зоны.
Правялі грамадскія абмеркаванні
У верасні ў Гродне прайшлі грамадскія абмеркаванні праекта рэканструкцыі набярэжнай Нёмана. Сустрэча з праекціроўшчыкамі адбылася 11 верасня, гараджанам прадставілі канцэпцыю будучай набярэжнай і далі магчымасць выказаць прапановы.
Пры гэтым, па водгуках удзельнікаў, цікавасць гараджан да гэтай сустрэчы апынулася невысокай: на абмеркаванне прыйшло няшмат людзей, у асноўным прадстаўнікі архітэктурнай супольнасці.
Маяк, веладарожка і новыя фотазоны: што з’явіцца на набярэжнай?
Планавалася, што ў ходзе рэканструкцыі расчысцяць прыбярэжную паласу, адновяць каменныя адхоны, створаць пешаходную алею і абмяжуюць рух транспарту.
Зробяць алею ўздоўж замкаў і зону прагулак. З’явіцца аглядная пляцоўка ў выглядзе вуглавога мосціка з відам на Нёман, побач усталююць плавучы фантан. Запланаваны месцы адпачынку, фотазоны, спускі да вады.
Каля Старога моста пабудуюць прычал для пракату сапбордаў і катамаранаў. Асобна абсталююць фестывальную пляцоўку для кінапраглядаў, кірмашоў, канцэртаў. Узімку тут хочуць заліваць каток і паставіць маяк для запуску ліхтарыкаў. Таксама зробяць веладарожку, якая злучыць набярэжную з пляжам і Пышкамі.
Уладкаваць набярэжную не атрымліваецца некалькі гадоў: бракуе грошай і ідэй
Мясцовыя ўлады спрабуюць добраўпарадкаваць набярэжную Нёмана ўжо некалькі гадоў запар. У 2019 годзе распрацавалі праект па добраўпарадкаванні тэрыторыі ад вусця Гараднічанкі да Новага моста, аднак грошай на яго рэалізацыю не знайшлося.
У 2023 годзе аблвыканкам абвясціў конкурс на лепшы праект па добраўпарадкаванні набярэжнай – паўдзельнічаць у ім маглі як архітэктары, так і звычайныя грамадзяне.
Аднак у лютым 2024 года стала вядома, што вызначыць пераможцу так і не змаглі. У конкурсе паўдзельнічалі 23 гродзенцы. Але, паводле слоў старшыні Гродзенскага гарвыканкама Андрэя Хмеля, ніводны з дасланых праектаў не адпавядаў умовам.
Варыянты, якія даслалі гродзенцы, планавалі закласці ў аснову праектавання набярэжнай. Яе хочуць адкрыць да 900-годдзя Гродна ў 2028 годзе.
