Гродзенцу Вані Сцяцэнку 23 лютага нарэшце ўвядуць прэпарат, які можа запаволіць развіццё хваробы хлопчыка — мышачнай дыстрафіі Дзюшэна-Бекера. Навінамі падзялілася яго маці Аляксандра ў TikTok.
Паводле слоў маці, дата працэдуры ўжо прызначана. Падрыхтоўка заняла больш часу з-за абставін, якія не залежалі ад сям’і і клінікі.
Раней сям’я паведамляла, што яны вылецелі ў Дубай, а пазней — што неабходныя лекі для Вані замоўлены. Да гэтага ў клініцы хлопчык прайшоў абследаванні і тэст на наяўнасць антыцелаў. Першапачаткова бацькі разлічвалі, што ін’екцыю зробяць яшчэ ў снежні, аднак тэрміны зрушыліся.
Elevidys — адзін з самых дарагіх прэпаратаў у свеце, яго кошт складае каля 2,9 млн долараў. Сродкі на лячэнне ўдалося сабраць 1 снежня 2025 года.
Як закрылі збор?
Збор для Вані ўдалося закрыць у тым ліку за кошт грошай, якія пералічылі з рахункаў арыштаваных гродзенскіх блогераў — Яўгеніі Тарасенка і Міхаіла Драгуна. Цяпер супраць пары вядзецца крымінальная справа ў махлярстве у асабліва буйным памеры. Санкцыі артыкула прадугледжваюць да 12 гадоў пазбаўлення волі. Яўгенію і Міхаіла выпусцілі з-пад варты, але з падпіскай аб нявыездзе. Міхаіла зноў узялі пад варту – ужо паводле новай крымінальнай справы аб паклёпе.
Прэпарат патрэбен яшчэ як мінімум пецярым дзецям
У Instagram-акаўнце, прысвечаным збору сродкаў, маці Вані падзякавала ўсім, хто меў дачыненне. “Дзякуй вам вялікі за дапамогу і за тое, што вы з намі былі і застаяцеся. Стан эйфарыі, кучу спраў яшчэ трэба зрабіць”, – сказала Аляксандра.
Гродзенка таксама нагадала аб іншых зборах, якія пакуль яшчэ вядуцца. Ін’екцыя супраць міадыстрафіі Дзюшэна-Бекера патрэбная Максіму Тамко, Максіму Шыла, Ягору Ярмаловічу, Арцёму Корбалю і Даніілу Дуку.
