У Гродне валанцёры зоаабарончай арганізацыі «Адданае сэрца» папрасілі гараджан аб дапамозе: домік для бяздомных жывёл засыпала снегам. Пост з заклікам дапамагчы расчысціць тэрыторыю, дзе ўтрымліваюцца сабакі, з’явіўся на старонцы арганізацыі ва «УКантакце».
«Звяртаемся да Вас, мужчыны! Нам вельмі патрэбна ваша дапамога. Домік для бяздомных сабак у Лапенках, зрэшты, як і ўвесь горад, засыпала снегам. Мы знаходзімся ў чыстым полі, там замітае імгненна… Снегу вельмі шмат. Рыдлёўкі ёсць 4, калі возьмеце сваю — таксама супер», — напісана ў пабліку ГГААЖ «Адданае сэрца».
«Дапамажыце, калі ласка, расчысціць гэтую снежную прыгажосць!!! Валанцёрам не хопіць сіл на барацьбу са снегам і догляд сабак. Валанцёры ўжо там, 2 далікатныя жанчыны, яны чакаюць дапамогі».
Калі вы хочаце дапамагчы прытулку ў гэтае снежнае надвор’е, то можна патэлефанаваць валанцёрам па нумары: +375 (29) 160-05-55.
Гродзенцы ўжо дапамагалі доміку для сабак падчас снегападаў
«Адданае сэрца» у Гродне не ўпершыню сутыкаецца з наступствамі моцных снегападаў. Пяць гадоў таму ў падобнай сітуацыі домік для сабак таксама апынуўся засыпаны снегам. Гараджане прыйшлі на дапамогу, расчысціўшы гурбы і забяспечыўшы доступ да вальераў для догляду за жывёламі.
Моцны снегапад у Гродне і Беларусі праз цыклон «Улі»
У Беларусь прыйшоў цыклон «Улі». Увечары 8 студзеня ён прынёс багатыя снегапады і моцны вецер. Паводле даных экстранных службаў, у асобных раёнах краіны вышыня снежнага покрыва ўжо перавысіла 30 сантыметраў. Праз непагадзь у краіне аб’яўлены павышаны ўзровень небяспекі, сітуацыя застаецца складанай і ў пятніцу. Гродну таксама дасталіся снег і завіруха.
Што за домік для сабак і хто за ім сочыць?
«Адданае сэрца» — некамерцыйная няўрадавая арганізацыя, якая існуе з 2011 года. Зоаабаронцы дапамагаюць бяздомным жывёлам за кошт ахвяраванняў. За жывёламі і іх часовым месцам жыхарства назіраюць валанцёры. Знойдзеных жывёл мыюць, апрацоўваюць ад паразітаў, іх аглядае ветэрынар, пры неабходнасці іх лечаць.
У 2018 годзе валанцёры арганізавалі на Фолюшы Дом для котак. Ён адкрыўся ў памяшканні былога медыцынскага прадпрыемства. Валанцёры «Адданага сэрца» і іншыя неабыякавыя людзі рабілі там рамонт, размяшчалі адначасова ад 40 да 60 котак, рэгулярна закуплялі для жывёл лекі, корм і цацкі. Праз будаўніцтва новых дамоў у мікрараёне валанцёрам прыйшлося шукаць новы дом для катоў. У пачатку 2024 года з такой жа праблемай сутыкнуўся і домік для сабак, створаны «Адданым сэрцам».
