Фатаграфію стацкага саветніка Валковіча прадавалі з аўкцыёну на пляцоўцы «Мешок». Пра гэта паведамілі ў Facebook-групе «Гродно». Здымак у сваім фотаатэлье зрабіў ганаровы грамадзянін Гродна Зельман Карасік.
Фатаграфію на аўкцыён выставіў калекцыянер з Санкт-Пецярбурга. Таргі завяршыліся на адзнацы 10,8 расійскіх рублёў (408 руб.). «Па папярэдніх дадзеных фатаграфія вернецца ў Гродна. Пераможца аўкцыёну — калекцыянер з Гродна», — дадала ў Facebook-публікацыі Таня Маркіна.
Магчыма, на здымку вядомы гродзенскі чыноўнік
У які год сфатаграфавалі стацкага саветніка — дакладна невядома. Як піша Маркіна, здымак зрабілі «ў знакамітым фотаатэлье Карасіка да рэвалюцыі». Пра гэта таксама сведчыць подпіс пад фота — ініцыялы фатографа і яго рэгаліі, пералічаныя на адваротным баку здымка.
Удзельнікам абмеркавання складана зразумець, хто дакладна з’явіўся на фота. На адваротным баку фота Таня Маркіна разгледзела прозвішча Валковіч.
Рэдакцыя Hrodna.life вывучыла здымак і прачытала подпіс на адваротным баку: «Маёй дачцэ (імя) ад мяне старога бацькі (ініцыял і прозвішча) на памяць. Хай будзе над ёю ласка Божая ва ўсё яе жыццё».
Магчыма, на фота маглі зняць начальніка Гродзенскага ўпраўлення Дзяржаўных маёмасцяў Акінфія Валковіча. Да Першай сусветнай вайны чыноўнік жыў на скрыжаванні сёлетніх вуліц Свярдлова і Сацыялістычнай у доме № 7. Да нашых дзён будынак не захаваўся.
Чым знакаміты Карасік?
Зельман Карасік быў адным з самых вядомых фатографаў Гродна. Фотаатэлье на вуліцы Саборнай, цяперашняя Савецкая, ён адкрыў у 1886 годзе. Пасля атэлье перамясцілася на вуліцу Калажанскую, цяпер гэта Калючынская.
Губернскае ўпраўленне выдала Карасіку спецыяльны дазвол на распаўсюджванне фатаграфічных відаў Гродна. Фатограф атрымаў званне ганаровага грамадзяніна горада.
Ягоны сын таксама займаўся фота, але імя гісторыкам невядомае. У гісторыю гродзенскай фатаграфіі ён увайшоў як Карасік-малодшы.
Чытайце таксама: Амерыканец шукае сляды продкаў, якія нарадзіліся ў Гродне — гараджане аднавілі прабелы па фотаздымку
