Гродзенскія блогеры Міхаіл Драгун і Яўгенія Тарасенка завалодалі грашыма падпісчыкаў. Але гэта зусім не абавязкова павінна было быць махлярства. Гродзенская адвакатка Надзея Цішкова пракаментавала справу блогераў у серыі гісторый у Instagram.
Не абавязкова махлярства, ёсць і іншыя паняцці
Сам факт завалодання грашыма не заўсёды азначае махлярства, падкрэсліла адвакатка.
— Далёка не кожнае завалоданне грашыма аўтаматычна з’яўляецца махлярствам. Ёсць і іншыя паняцці — сума неабаснаванага ўзбагачэння або атрыманне даходу ў выніку незаконнай прадпрымальніцкай дзейнасці, — сказала яна.
У сваіх сторыс адвакатка апублікавала спіс прыкмет, якія, па яе словах, могуць указваць на склад махлярства. Сярод іх — намер завалодаць грашыма, невыкананне ўмоў розыгрышу і адмова пералічыць сродкі на лячэнне.
Адвакатка адзначыла, што затрыманыя блогеры з Гродна згадваюцца як падазраваныя, а не абвінавачаныя або асуджаныя. Таксама яна не згодная з фармулёўкай аб дзеяннях «групы асоб» і аналізуе сітуацыю ў дачыненні да аднаго з блогераў.
«Удзельнікі ведалі ўмовы інтэрактыву»
Пасля вывучэння сацыяльных сетак Міхаіла Драгуна і «тлумачэнняў грамадзян, што выказваліся па гэтай сітуацыі», Надзея Цішкова прыйшла да высновы, што ўдзельнікі розыгрышаў ведалі ўмовы ўдзелу.
— Самі людзі казалі, што ведалі, якія ўмовы ўдзелу ў інтэрактыве. Блогер тлумачыў, што частка грошай пойдзе на лячэнне хлопчыка, за большую частку будуць набывацца класныя прызы і падарункі, а частка застанецца яму ў якасці ўзнагароджання, — расказала юрыстка.
«Аб тым, што ён кагосьці падмануў, казаць я не магу»
Толькі ў некаторых выпадках Драгун пазначаў, што канкрэтныя розыгрышы цалкам накіраваны на збор сродкаў для дзіцяці. У астатніх выпадках блогер казаў, што толькі частка пойдзе на лячэнне. Астатняе — на прызы і яго ўзнагароджанне.
— Ён выканаў усе ўмовы, якія абяцаў. Таму казаць аб тым, што ён кагосьці падмануў, я, па меншай меры, не магу, — сказала адвакат.
Што вядома аб справе абвінавачаных у махлярстве гродзенскіх блогераў
Гродзенскіх блогераў Міхаіла Драгуна (iceedvard) і Яўгенію Тарасенка (Jennie.T) затрымалі аператыўнікі 4 лістапада ў Гродне. Па дадзеных МУС, яны збіралі грошы на лячэнне цяжка хворага дзіцяці, але нібыта выдаткавалі частку грошай на сябе.
«З 1,5 мільёна рублёў толькі 200 тысяч перадалі маці дзіцяці, 315 тысяч выдаткавалі на падарункі ўдзельнікам стрыму. Астатнія каля мільёна рублёў блогеры выдаткавалі на „прыгожае жыццё“ — паездкі на Мальдывы і ў ААЭ, арэнду элітнага жылля, азартныя гульні і іншыя забавы», — паведамілі ў міліцыі.
Праз два дні міліцыя апублікавала відэа затрымання Яўгеніі Тарасенка і яе партнёра Міхаіла Драгуна. На кадрах відаць, як сілавікі спыняюць іх аўтамабіль на вуліцы Гарнавых. У роліку паказаны таксама прызнанні затрыманых і іх знаёмых. Паведамлялася і пра ператрус у кватэры гродзенцаў.
Сілавікі сцвярджалі, што грошы блогеры выводзілі праз банкаўскія карты знаёмых. У відэа паказалі інтэрв'ю з двума з іх. Адзін мужчына расказаў, што праз яго рахунак прайшло каля 500 000 беларускіх рублёў.
«Сябе з усёй сумы абароту я прысвоіў $ 20 000 — лічу, заслужана»
Затрыманых гродзенскіх блогераў адпусцілі 7 лістапада пад падпіску аб нявыездзе. Пад вартай яны прабылі трое сутак. Блогеры супрацоўнічаюць са следствам. Да суда яны будуць знаходзіцца на свабодзе.
Пасля вызвалення Міхаіл Драгун апублікаваў пост у сваім Telegram-канале. Там ён патлумачыў, чаму не лічыць сябе вінаватым. З яго слоў, маці хворага дзіцяці ён перавёў каля $ 100 000. Частка грошай пайшла на набыццё прызоў для інтэрактыву — аўтамабіль, мабільныя тэлефоны і іншае.
«Сябе з усёй сумы абароту я прысвоіў $ 20 000 — лічу, заслужана», — адзначыў Драгун і падкрэсліў, што нават «фонды не заўсёды аддаюць усе».
