У краме аграгарадка Абухава прадавалі пратэрмінаваныя прадукты — ёгурт, глазіраваны сырок, мармелад, малако і ватрушкі. За апошнія чатыры гады прадпрыемства ўжо 12 разоў прыцягвалі да адміністрацыйнай адказнасці за падобныя парушэнні.
Пасяджэнне суда прайшло на юрыдычным факультэце ГрДУ, паведамляе тэлеканал «Гродна Плюс».
Падчас апошняй праверкі спецыялісты выявілі шэсць відаў тавараў з мінулым тэрмінам прыдатнасці і прыпынілі іх продаж. Матэрыялы праверкі накіравалі ў суд. Раней спецыялісты неаднаразова накіроўвалі паведамленні і выносілі прыватныя вызначэнні, папярэджваючы аб недапушчэнні парушэнняў умоў і правіл продажу тавараў.
На гэты раз эканамічны суд Гродзенскай вобласці аштрафаваў прадпрыемства на 3 150 рублёў.
Колькі яшчэ спраў па пратэрміноўцы на Гродзеншчыне дайшлі да суда
Суддзя эканамічнага суда Гродзенскай вобласці Дзяніс Кот адзначыў, што ў гэтым годзе суд разгледзеў 20 спраў па продажы тавараў з мінулым тэрмінам прыдатнасці. Паводле яго слоў, практыка паказвае, што не ўсе прадпрымальнікі пасля накладання штрафаў прымаюць меры, каб такія парушэнні больш не паўтараліся.
