Дзве сяброўкі з Магілёва з’ездзілі ў Гродна і расказалі ў TikTok, колькі патрацілі на паездку. На дваіх выдаткі склалі 395 рублёў, пры гэтым большая частка сумы пайшла на дарогу паміж абласнымі цэнтрамі. Мяркуючы па ўсім, турысткі правялі ў горадзе адзін дзень.
Цягнік Магілёў-Гродна абышоўся ў 96 рублёў за купэ разам з пасцельнай бялізнай на дваіх. Кватэру ў цэнтры горада дзяўчаты знялі за 70 рублёў за суткі. Даехалі ад вакзала да свайго часовага жылля за 2,5 рубля. Снедалі дзяўчаты алівамі, вінаградам і кавай. За ўсё заплацілі 9 рублёў.
За абед у адной з устаноў горада аддалі на дваіх 44 рублі. А вось вячэра выйшла ў 12 рублёў. Але вячэралі ўжо дома.
Да Старога замка ехалі таксама на таксі. Аддалі за паездку пяць рублёў.
На сувеніры турысткі патрацілі 48 рублёў. Дарога назад да Магілёва абышлася ў 110 рублёў на дваіх.
Каментатары пад відэа падзяліліся: хтосьці казаў, што выйшла дорага, а хтосьці, наадварот, сцвярджаў, што падарожжа атрымалася недарагім.
«На дваіх — ну вельмі бюджэтна, улічваючы, што асноўныя выдаткі прыпалі на дарогу», — напісала адна з каментатарак.
Дарэчы, як бюджэтна з’ездзіць у Гродна нядаўна расказвалі і мінчане. Пара з Мінска правяла ў абласным цэнтры пяць дзён, і агульная сума выдаткаў за гэтыя дні склала каля 600 рублёў. За жыллё турысты не плацілі — начавалі ў намёце на беразе Нёмана. Па горадзе перамяшчаліся выключна на ўласных роварах. А самыя вялікія выдаткі ў іх былі на сувеніры і памятныя дробязі, а таксама на харчаванне ў кафэ.
