Тэлефонную лінію ў Астраўцы праводзіў намеснік начальніка УУС Гродзенскага аблвыканкама Максім Руды. На прыём да яго не запісаўся ніводны мясцовы жыхар. Руды ацаніў гэты факт як станоўчы, піша «Астравецкая праўда».
Калі гараджане не запісаліся на прыём да «прадстаўніка абласнога ўпраўлення», значыць раённыя ведамствы правялі «добрую працу», лічыць Руды.
Чыноўнік таксама расказаў, з якімі пытаннямі гараджане часцей за ўсё звяртаюцца да супрацоўнікаў міліцыі. «Большасць з іх бытавога плана. Напрыклад, не ўжыліся з суседзямі. Што тычыцца дзейнасці крымінальнай міліцыі, якую я курырую, скажу, што апошнім часам пытанняў у гэтым кірунку становіцца менш», — сказаў Руды.
На думку чыноўніка, адзін з «новых і праблемных напрамкаў» — злачынствы ў інтэрнэце. Руды дадае, што раскрывальнасць гэтых злачынстваў расце — кібермахляроў вылічаюць і ў Беларусі, і за мяжой. «Але, з прычыны палітычнай сітуацыі, якая склалася, дастаць іх адтуль складана».
Чытайце таксама: Гродзенец вярнуўся з-за мяжы праз «камісію па вяртанні» — крымінальную справу не закрылі
