Праванабярэжную ў Гродне чакае рэканструкцыя — там уладкуюць рэкрэацыйную зону. На схеме відаць, што яна будзе размяшчацца ад піўзавода да ўпадзення Гараднічанкі ў Нёман.
Уздоўж вуліцы з’явяцца азеляненне і пешаходныя дарожкі. Пабудуюць пірс і тэрасы над Нёманам. Для адпачынку размесцяць лаўкі і, верагодна, фантаны.
Упраўленне капітальнага будаўніцтва Гродзенскага аблвыканкама шукае падрадчыка для распрацоўкі перадпраектнай дакументацыі. На яе выдаткуюць 16 200 рублёў з абласнога бюджэту. Яе плануюць завяршыць да канца жніўня.
Раней улады абяцалі добраўпарадкаваць набярэжную да 2028 года як «падарунак» да 900-годдзя Гродна. Telegram-канал Urban Hrodna вылучаў праблемы — у тым ліку адсутнасць лавак, прыбіральняў і бяспечнай прасторы.
Ідэі для новай набярэжнай улады збіралі сярод гродзенцаў у 2023 годзе. Але ў выніку лепшую канцэпцыю так і не выбралі — нібыта ні адзін з прапанаваных праектаў не адпавядаў умовам. Чыноўнікі паабяцалі распрацаваць сваю канцэпцыю і выставіць яе на грамадскае абмеркаванне.
