У цэнтры Гродна пачалі рамантаваць 126-гадовы будынак — ён стаіць на вуліцы ўсяго з двума дамамі

Пачалі капітальны рамонт 126-гадовага будынка па вуліцы 11 Ліпеня, 18, у гістарычным цэнтры Гродна. Гэтая вуліца — адна з самых кароткіх у горадзе: на ёй засталося ўсяго два дамы.

Жылы дом № 18 знаходзіцца ў Швейцарскай даліне, на беразе Гараднічанкі, за будынкам гарвыканкама. Дом з’яўляецца гісторыка-культурнай каштоўнасцю, таму капітальны рамонт неабходна было ўзгадняць з Міністэрствам культуры.

Работы плануюць завершыць у красавіку 2025 года.

Будынак пабудаваны ў 1898 годзе. Двухпавярховы, неатынкаваны, з жоўтай цэглы. Карніз прафіляваны, дэкаратыўны міжпаверхавы пояс аздоблены сухарыкамі. Вокны маюць лучковыя перамычкі. Стыль — эклектыка. Паводле даведніка «Біяграфія гарадзенскіх вуліц», у доме ацалелі дзве багата аздобленыя кафляныя печы. Дом належаў Аўгустоўскаму, А. Мразоўскаму, Соф'і Клікс (1923). Пазней яго купіў стараста Пакроўскага сабора Аляксандр Малашка. Большасць кватэр здавалася ў арэнду. У 1939 годзе дом канфіскавалі. Пасля 1944 года тут жылі супрацоўнікі савецкіх органаў. Дачка былога гаспадара Веру Малашка перасялілі ў драўляны дом побач (знесены ў 2007 годзе).

Што будуць рабіць у будынку?

У гарвыканкаме агучылі асноўныя этапы рамонту:

• поўная замена даху, уключна з кроквеннай сістэмай;
• мыйка фасадаў з выкарыстаннем хімічных складаў;
• разборка старых драўляных ганкаў і ўзвядзенне новых;
• замена вокнаў;
• замена сантэхнічнай сістэмы ў тэхнічным падполле;
• замена сістэмы электразабеспячэння, уключна з устаноўкай новых павярховых шчытоў.

Гісторыя вуліцы і яе назвы

Раней тут быў цэлы жылы квартал з двух дзясяткаў цагляных дамоў. Амаль усе знеслі, захаваліся толькі два — № 3 і № 18. Абодва з’яўляюцца гісторыка-культурнай каштоўнасцю. Дом № 3 быў пабудаваны ў 1908−1911 гадах. Некалькі гадоў таму будынак купіў гродзенскі бізнесмен, рэканструяваў і здае яго ў арэнду.

У міжваенны перыяд вуліца насіла назву Святога Мікалая, піша канал Hrodna History. Так яе назвалі ў памяць аб храме ў гонар святога, які ў сярэдзіне XVII стагоддзя знішчылі маскоўскія войскі. Калі ў 1939 годзе Гродна занялі саветы, праз год вуліцу перайменавалі. Яна стала называцца 11 Ліпеня, у гонар дня, калі ў 1920 годзе Чырвоная армія вызваліла Мінск ад польскіх войскаў падчас савецка-польскай вайны.

У 1990-х гадах назвы вуліц перапісвалі на рускую мову і адбылася смешная памылка. У лічбе «11» убачылі нешта падобнае да літары «П» (можа, верхняя рыска сцерлася). Такім чынам вуліцу перайменавалі ў гонар нікому не вядомага і неіснуючага чалавека «П. Ліпеня». Такую назву вуліца насіла да 2009 года, пакуль памылку не выявілі і не зразумелі, што такога чалавека ніколі не існавала.

Чытайце таксама: Праблемны дом на Вялікай Траецкай паставяць на капрамонт