Чарговы суд “Аб прызнанні інфармацыйнай прадукцыі экстрэмісцкімі матэрыяламі” пройдзе ў Гродне 29 лістапада. Зацікаўленай асобай па ім праходзіць Аляксей Чамаданаў, стваральнік бегавога клуба і школы бегу Run4fun.
Невядома, ці ідзе гаворка аб прызнанні экстрэмісцкімі асабістых сацсетак Аляксея або арганізацыі. Вядома, што на гэты момант ён знаходзіцца не ў Беларусі.
Пасяджэнне будзе весці Артур Лешык у судзе Ленінскага раёна Гродна 29 лістапада. Заяўнік – Анатоль Іванюк, пракурор Гродна.
Run4Fun – бегавы клуб, прадстаўлены ў шасці гарадах краіны. Існуе з 2015 года. Да яго далучылася каля 1000 чалавек. Яго члены ўдзельнічаюць у забегах у Беларусі і за мяжой. Клуб праводзіў мерапрыемствы з уладамі – напрыклад, “Забег цвярозасці” 1 студзеня.
