Дырэктар намаляваў месца захоўвання труб ад рукі. Высветліліся падрабязнасці гібелі 4-гадовага хлопчыка ў Лідзе

Да дзесяці гадоў турмы пагражае кіраўніку арганізацыі, якая паклала каналізацыйныя трубы ў незаконным месцы. Гэтымі трубамі вагой да 2 тон год таму да смерці прыціснула чатырохгадовага хлопчыка. Кіраўнік ад рукі выправіў план участку, каб засцерагчы сябе, але яго пакараюць не толькі за гэта.

Трагедыя адбылася 19 жніўня 2023 года, калі дзеці гулялі каля каналізацыйных труб, што ляжалі ў адкрытым доступе. Раней на гэтым месцы была дзіцячая пляцоўка, а непадалёк стаяць жылыя дамы. Дзеці залазілі на трубы і скокалі ўніз, разгойдвалі іх, калі іншыя бегалі побач або былі ўсярэдзіне. У нейкі момант трубы, кожная з якіх важыць каля двух тон, прыціснулі чатырохгадовага хлопчыка. Ён сканаў па дарозе ў лякарню.

Чытайце таксама: «Адарву галаву». Бацькоў з Гродна заклікалі вучыць дзяцей паводзіць сябе ў грамадскіх месцах

Маляваў і краў

Следчы камітэт Лідскага раёна выявіў, што трубы захоўваліся на неагароджаным участку, парушаючы патрабаванні бяспекі. З красавіка 2023 года побач пракладалі вонкавыя сеткі каналізацыі. 40-гадовы дырэктар будаўнічай арганізацыі даў незаконнае ўказанне аб часовым складаванні матэрыялаў, нягледзячы на ​​папярэджанні галоўнага інжынера. Месца не было прадугледжана для захоўвання труб ні праектнай, ні тэхналагічнай дакументацыяй, не было ўзгоднена ні з замоўцам, ні з праектнай арганізацыяй. Дырэктар заявіў, што адказнасць будзе на ім. Пасля гібелі хлопчыка ён паспрабаваў схаваць парушэнне і ад рукі дамаляваў на адным з аркушаў будгенплана пляцоўку для захоўвання негаручых матэрыялаў.

Следчыя правялі экспертызу і выявілі падман, але гэта не ўсё. Аказалася, што дырэктар двойчы даваў незаконныя ўказанні падначаленым на складанне дакументаў для атрымання гадавых бонусаў. Агульная сума страты для арганізацыі склала амаль 35 тысяч рублёў.

Што пагражае дырэктару

Мужчыну прад’явілі абвінавачанне па некалькіх артыкулах Крымінальнага кодэкса Беларусі, пры тым большы тэрмін пагражае не за смерць хлопчыка, а за крадзеж:

• ч. 2 арт. 303 (парушэнне правілаў бяспекі будаўнічых работ, якое прывяло па неасцярожнасці да смерці чалавека) — караецца абмежаваннем волі на тэрмін да пяці гадоў або пазбаўленнем волі на тэрмін ад двух да сямі гадоў з пазбаўленнем права займаць пэўныя пасады або займацца пэўнай дзейнасцю або без пазбаўлення.
• ч. 1 арт. 380 (падробка афіцыйнага дакумента ў мэтах выкарыстання яго самім выканаўцам, іншай асобай, выкарыстанне заведама фальшывага дакумента) — цягне грамадскія працы, або штраф, або папраўчыя работы на тэрмін да двух гадоў, або арышт, або абмежаванне волі на тэрмін да двух гадоў.
• ч. 3 арт. 210 (крадзеж шляхам злоўжывання службовымі паўнамоцтвамі, учынены паўторна, у буйным памеры) — цягне пазбаўленне волі на тэрмін ад трох да дзесяці гадоў са штрафам і з пазбаўленнем права займаць пэўныя пасады або займацца пэўнай дзейнасцю.

Чытайце таксама: Суд аб рамонце трубы: пенсіянерцы паменшылі доўг і прызначылі маральную кампенсацыю ад Гроднавадаканала