У Гродне нарэшце ўвялі анлайн запіс на практычны іспыт у ДАІ

Анлайн-рэгістрацыя на здачу практычнага экзамену ў Міжраённым рэгістрацыйна-экзаменацыйным аддзеле ДАІ УУС у Гродне ўвялі з 1 кастрычніка.

Цяпер можна выбраць зручную дату і час для практычнага кваліфікацыйнага іспыту анлайн, запоўніўшы электронную форму праз спасылку https://forms.gle/nBwkvo6vR3ukvQbN9 ці QR-код.

Для запісу неабходна пазначыць электронную пошту, нумар заявы і ўпадабаную дату з прапанаваных. Пасля гэтага на e-mail прыйдзе пацвярджэнне. Пакуль паслуга працуе ў тэставым рэжыме.

Выбраць яшчэ адну дату да ўжо вызначанай даты здачы нельга. У выпадку няўдачы з практычным іспытам пераздаць можна праз 10 дзён на 11-ты (не лічачы сам дзень здачы).

Пры здачы практычнага іспыту па анлайн-рэгістрацыі экзаменатару трэба прад’явіць раздрукаванае пацверджанне запоўненай формы, або паказаць яго электронны варыянт на смартфоне.

Раней, каб запісацца на іспыт, трэба было прыехаць асабіста ў МРЭА ДАІ і адстаяць чаргу для рэгістрацыі, а потым займаць жывую чаргу і чакаць на экзаменацыйнай пляцоўцы. Гэта адбірала шмат сіл і нерваў у тых, хто рыхтаваўся здаць экзамен.

Што трэба для практычнага іспыту ў ДАІ

Для допуску да здачы практычнага іспыту экзаменатару трэба будзе прад’явіць:

• дакумент, які сведчыць асобу;
• дзейную медыцынскую даведку ўзору Міністэрства аховы здароўя Рэспублікі Беларусь;
• аплату дзяржаўнай пошліны за прыём практычнага іспыту.

Для здачы практычнага іспыту на вучэбным аўтамабілі МРЭА ДАІ неабходна прад’явіць таксама квітанцыю аб аплаце гэтай паслугі. Таксама можна здаваць іспыт на аўтамабілі сваёй аўташколы.

Чытайце таксама: У Гродне затрымалі мужчыну — ён зняў чэргі ў ДАІ