Гродна і Ліда трапілі ў топ папулярных летніх аўтобусных маршрутаў сярод мінчан

Маршруткі "Гродна - Мінск". Крыніца: АўтаГродна

Гродна і Ліда сталі самымі папулярнымі летнімі напрамкамі для паездак у межах Беларусі паводле агрэгатара «Атлас». Пасажыры найчасцей набывалі аўтобусныя білеты ў гэтыя два гарады. Узрасла і колькасць браніраванняў гатэляў у Гродне.

Летам мінчане ездзілі ў Гродна і Ліду

Самым запатрабаваным накірункам у «Атласе» стаў маршрут Мінск — Гродна і Гродна — Мінск. Пры гэтым білеты набывалі не толькі ў выхадныя, але і ў буднія дні.

На другім месцы маршрут Мінск — Ліда. Як адзначае «Атлас», вялікая актыўнасць назіралася падчас святкавання Дня горада ў Лідзе. «На свята адправілася нямала іншагародніх гасцей», — адзначае агрэгатар.

Па тэме: Набыць аўтобусныя білеты на Дзень горада ў Лідзе аказалася складана

Таксама ў топ запатрабаваных маршрутаў трапілі Гродна — Ліда і Гродна — Ваўкавыск.

У Гродне ўсё часцей браніруюць гатэлі

Таксама Гродна паказала самы вялікі прырост па колькасці браніравання нумароў у гатэлях за жнівень. У параўнанні з тым жа перыядам 2023 года гэты паказчык вырас на 247%.

Далей ідзе Віцебск — 173%, Брэст — 165% і Мінск — 115%, паведамляе Рэспубліканскі саюз турыстычнай індустрыі.

Агулам найбольшая частка браніраванняў па Беларусі назіраецца ў Мінску — 62% з усіх заказаў. На другім месцы Брэст — 10%. Гродна ў гэтым спісе на трэцім месцы — 7%.