У Гродне адновяць сквер на Леванабярэжнай. Там з’явяцца месцы для моладзі, прагулак і кафэ

Сквер у межах вуліц Гарнавых, Дарвіна, Леванабярэжнай у Гродне збіраюцца рэканструяваць. Будаўніцтва пачнуць у сакавіку 2025 года. Для пачатку распрацоўваюць перадпраектную дакументацыю.

Што з’явіцца ў скверы:

• аўтапаркоўка,
• аглядныя пляцоўкі з агароджай,
• пляцоўка для нестацыянарнага кафэ,
• велапаркоўкі,
• забаўляльная пляцоўка для моладзі,
• гульнявая пляцоўка для дзяцей,
• прагулачныя алеі з лавамі і сметніцамі,
• асвятленне сквера,
• азеляненне тэрыторыі устойлівым газонам і каштоўнымі пародамі зеляніны.

Магчыма, з’явяцца статуі. Планаванне пешаходных пераходаў і парковак узгодняць з ДАІ. Трэба прадугледзець, каб перамяшчэнне было камфортным для людзей з інваліднасцю, фізічна аслабленых асоб, людзей з каляскамі. Каб аўтамабілі не пранікалі на тэрыторыю для веласіпедыстаў і пешаходаў, усталююць шлагбаўмы і баларды.

Дакументы на будаўніцтва выдаў гарвыканкам у канцы ліпеня 2024 года. Сквер знаходзіцца на тэрыторыі гісторыка-культурнай каштоўнасці «Гістарычны цэнтр Гродна» і ў водаахоўнай зоне Нёмана. Пры правядзенні работ абавязковы археалагічны нагляд і ахова археалагічных аб’ектаў.

Гродзенская гарадская жыллёва-камунальная гаспадарка праводзіць дзяржзакупку, каб вывучыць цану на выраб дакументацыі. На яе плануюць выдаткаваць 12 952.81 рублёў з гарадскога бюджэту. Яна павінна быць гатовая да 4 кастрычніка.

Чытайце таксама: «Наше место»: пара открыла кафе на своем любимом месте в Гродно