Затрыманні ў Слоніме, завочныя прысуды, санкцыі Захаду. Як прайшоў тыдзень у Гродне і вобласці

7 жніўня ў Смаргоні затрымалі восем чалавек. Завочна асудзілі актывістку Кацярыну Туманаву і журналіста Алеся Кіркевіча. Еўрасаюз увёў новыя санкцыі супраць беларускіх сілавікоў. Рэдакцыя Hrodna.life вывучыла, што адбылося ў вобласці c 5 па 11 жніўня.

Актывістку Кацярыну Туманаву завочна асудзілі на 2,5 гады калоніі

2 жніўня суд Кастрычніцкага раёна Гродна паводле ч.1 арт. 342 КК і арт. 364 КК прызначыў Кацярыне Туманавай 2,5 года калоніі агульнага рэжыму. Яе абвінавацілі ва ўдзеле ў групавых дзеяннях, якія груба парушаюць грамадскі парадак, і ў гвалце і пагрозе прымянення гвалту ў дачыненні да сілавіка.

Арышт, накладзены на яе маёмасць, знялі. Тэрмін адбыцця пакарання будуць лічыць з дня яе фактычнага затрымання.

На ўездзе ў Беларусь затрымалі адміністратара групы дапамогі беларусам

Мужчыну клічуць Алекс Хахлоў. Яго затрымалі за «БЧБ-дзейнасць». Ён быў адміністратарам канала «Кошечки, собачки в Гродно» і Facebook-суполкі «Помощь белорусам за границей». Таксама ён нібыта абражаў супрацоўнікаў сілавых структур, перасылаў дадзеныя ў групы «Каратели» і «Черная книга», заклікаў людзей да здзяйснення злачынстваў.

Затрыманне адбылося ў пункце пропуску «Грыгароўшчына» на беларуска-латвійскай мяжы. Яго перадалі ў Верхнядзвінскі РАУС.

Палітвязень Дзяніс Івашын, верагодна, знаходзіцца ў ШІЗА

Ад яго не было лістоў 20 дзён. «Таму, да моманту зьяўленьня новых паведамленьняў ад Дзяніса, мы будзем лічыць, што яго зьмясьцілі ў ШЫЗА. Тым больш, калі палітвязьням і рабіць нічога ня трэба, каб „зарабіць“ такое „пакараньне“. Пры жаданьні і наяўнасьці загаду содні ў адзіночцы могуць „прыляцець“ за расшпілены ґузік ці „недастаткова добры“ настрой падчас праверкі», — напісала яго жонка Вольга.

Лідчаніна затрымалі за падпіскі і распаўсюд экстрэмісцкіх каналаў

Затрымліваць мужчыну прыехалі шэсць сілавікоў. Яго раней ужо судзілі за распаўсюд экстрэмісцкіх матэрыялаў і ўдзел у пратэстах. Доўгі час ён працаваў за мяжой, але вярнуўся ў Беларусь. Сілавікі звярнулі ўвагу на татуіроўкі з арнаментам у мужчыны.

Еўрасаюз увёў чарговыя санкцыі супраць беларускіх сілавікоў: вось хто ў спісах з Гродна і вобласці

Еўрасаюз увёў санкцыі супраць 28 грамадзян Беларусі: начальнікаў у сістэме МУС, пракурораў, суддзяў, супрацоўнікаў дзяржаўных медыя і аднаго бізнесмена. Hrodna.life знайшоў у спісе людзей, звязаных з Гродна і Гродзенскай вобласцю.

Instagram-акаўнт актывіста з Гродна Дзяніса Чашчэвіка denroy86 прызналі экстрэмісцкім

Так вырашыў суд Пухавіцкага раёна 6 жніўня 2024 года.

Таксама экстрэмісцкімі прызналі:

• Telegram-чат «Комментарии @belamova» — па рашэнні суда Ленінскага раёна Гродна ад 7 жніўня 2024 года.
• TikTok-акаўнт «sokarkin» і яго лагатып — па рашэнні суда Лідскага раёна Гродзенскай вобласці ад 6 жніўня 2024 года.

Новыя «экстрэмісты»

Сямчук Андрэй Іванавіч з Гродна, Дарагі Міхаіл Ігаравіч з Ваўкавыскага раёна 9 жніўня папоўнілі «спіс экстрэмістаў».

Затрыманне ў Слоніме

7 жніўня ў Смаргоні затрымалі восем чалавек. Гэта работнікі мясцовага прамысловага прадпрыемства. Некаторых затрымлівалі проста на працы, іншых — дома. Затрыманых даставілі ў РАУС і пачалі адміністрацыйныя справы паводле артыкула 19.11 КаАП, паведамляе «Гарадзенская вясна».

Гродзенскага журналіста Алеся Кіркевіча завочна асудзілі - у тым ліку за відэа пра Бондараву

Алеся Кіркевіча 2 жніўня прызналі вінаватым паводле двух «экстрэмісцкіх» артыкулаў. Яму прызначылі сем гадоў узмоцненага рэжыму са штрафам у 600 базавых велічынь (24 000 рублёў). У яго канфіскуюць траціну дома ў Віцебскай вобласці.

Ліквідуюць «Гродзенскую гарадскую федэрацыю футбола». Кіраўніка затрымлівалі за палітыку

Пасяджэнне аб ліквідацыі грамадскага аб’яднання «Гродзенская гарадская федэрацыя футбола» пройдзе ў Гродзенскім абласным судзе 16 жніўня. Яе кіраўніка затрымлівалі ў тым ліку за канфлікт з Яўгенам Дудко.

У палітэмігрантаў з Гродна Фурманавых нарадзіўся сын

У былога палітвязня з Гродна Дзмітрыя Фурманава і яго жонкі Вольгі нарадзіўся сын. Пра гэта пара распавяла ў сацсетках сваёй крамы сувеніраў «KROPKA».

Блогер Vadimati распавёў, як праз турму не паспеў папярэдзіць рак

Блогер і былы палітвязень Вадзім Ермашук распавёў, што пасля калоніі ў яго сапраўды выявілі анкалогію — злаякасную меланому. Яна апынулася «быццам бы» трэцяй стадыі (усяго — чатыры, адлік ідзе з першай). Цяпер яе ўдала выдалілі. У Вадзіма да затрымання назіралі радзімку, ён хацеў яе выдаліць — і не паспеў. Пазней ён прасіў пра візіт анколага ў месцах пазбаўлення волі. Але яму адмовілі.

Суд у Гродне адмовіў у іску «Флагман М’юзік» да Бондаравай

У іску ТАА «Флагман М’юзік» аб абароне дзелавой рэпутацыі да Вольгі Бондаравай адмовіў эканамічны суд Гродзенскай вобласці. Пра гэта напісала Бондарава ў сваім Telegram-канале. Справу разглядала Наталля Карых.

Rzeczpospolita: Анджэй Пачобут пагадзіўся з’ехаць з Беларусі яшчэ вясной

Палітвязень, журналіст і лідар польскай меншасці ў Беларусі Анджэй Пачобут яшчэ ў красавіку 2024 года пагадзіўся пакінуць Беларусь. Пра гэта газеце Rzeczpospolita расказала кіраўнічка непрызнанага беларускімі ўладамі Саюза палякаў у Беларусі Анжаліка Борыс.