Жыхары Гродзенскай вобласці ўсё часцей звяртаюцца па медыцынскую дапамогу з-за ўкусаў кляшчоў. За першае паўгоддзе 2024 года колькасць укусаў вырасла на траціну ў параўнанні з мінулым годам. Гродзеншчына застаецца адным з лідараў па колькасці ўкусаў і інфіцыраванняў энцэфалітам.
Дзе ў Гродне і ваколіцах часцей за ўсё кусаюць кляшчы
За паўгода ў Гродне і вобласці на 30,8% павялічылася колькасць чалавек, якія звярнуліся па медыцынскую дапамогу з-за ўкусаў кляшчоў. За аналагічны перыяд 2023 года пацярпела 1549 чалавек, сёлета — 2239.
Часцей за ўсё кляшчы трапляліся на тэрыторыі Гродзенскага раёна — 53,1% ад усіх выпадкаў. З іх у сельскай мясцовасці, на дачных участках і тэрыторыях прыватных сядзіб — 35%. У лясных масівах, якія знаходзяцца побач з гарадской забудовай — 31% выпадкаў. У лясах Гродзенскага раёна — 18% выпадкаў.
Стабільна высокі ўзровень укусаў рэгіструецца ў лясах у Капцёўскім, Сапоцкінскім, Падлабенскім, Гожскім, Азёрскім і Парэчынскім сельсаветах. Прычына ў вялікай колькасці садовых таварыстваў, куды летам ездзяць адпачываць гродзенцы, паведамляюць у Гродзенскім занальным цэнтры гігіены і эпідыміялогіі.
Радзей з укусамі кляшчоў сутыкаюцца ў межах горада: на дачных участках — 3,6% выпадкаў, у жылых раёнах — 0,6% і ў зонах для адпачынку 0,3%.
Якія тэрыторыі ў Гродне ўжо апрацавалі ад кляшчоў
У траўні ад кляшчоў апрацавалі тэрыторыі ва ўрочышчах Пышкі і Ласосна, лесапаркавую зону Румлёва і Каложскі парк, а таксама возера Юбілейнае, парк Жылібера і сквер у мікрараёне Альшанка. Паўторна гэтыя ж тэрыторыі апрацавалі ў канцы ліпеня.
У чэрвені апрацавалі скверы і паркі ў Скідзелі, а таксама зону для адпачынку каля Сухаўлянаў.
Гродзенская вобласць — лідар па інфіцыраваннях энцэфалітам
Сёлета ў Беларусі зафіксавалі анамальны рост колькасці кляшчоў. Спецыялісты налічылі іх у 1,6 разоў больш, чым у такі ж перыяд 2023 года. Найбольш пацярпелых зафіксавалі ў Гродзенскай і Брэсцкай абласцях, а таксама ў Мінску.
Згодна з даследаваннямі пашырэння клешчавога энцэфаліту ў Беларусі, з 1995 па 2022 год назіраецца рост заражэнняў. Два гады таму лідарам па колькасці інфіцыраванняў стала Гродзенская вобласць — 11,5 выпадкаў на 100 тыс. чалавек.
У пачатку лета на e-petitions.by з’явіўся зварот аб унясенні вакцынацыі ад энцэфаліту ў Нацыянальны каляндар прафілактычных прышчэпак. Таксама аўтары петыцыі прасілі выдзеліць бюджэтныя сродкі на вакцынацыю насельніцтва ў абласцях з найвышэйшымі паказчыкамі заражэння — Гродзенскай і Брэсцкай.
У канцы ліпеня аўтары звароту атрымалі адмову ад Мінздароўя. У адказе чыноўнікі спасылаліся на тое, што «даведачна ў Беларусі паказчык захворвання складае 2,2 выпадкі на 100 тысяч насельніцтва».
