Гродзенец Ігар Банцэр стаў у Варшаве бяздомным. Ён ужо год начуе, дзе прыйдзецца

Вакаліст гурта Mister X і актывіст з Гродна Ігар Банцэр ужо каля года начуе ў выпадковых месцах Варшавы: то ў машыне сябра, то ў начлежцы для бяздомных. Пры гэтым, пра тое не ведаюць нават многія блізкія і сябры Ігара. Фотагісторыю пра адзін дзень Ігара Банцэра ў Варшаве апублікаваў фатограф і бізнес-кансультант Аляксандр Валодзін.

Адзін дзень Ігара Банцэра

«Да начлежкі для бяздомных, якая знаходзіцца на тэрыторыі завода-банкрута, што выпускаў раней бетонныя вырабы, я прыехаў у 6:00. У 5:55 у людзей, якія скарысталіся начлежкай, пад’ём, потым іх кормяць сняданкам, і яны павінны пакінуць памяшканне да вечара», — піша Валодзін.

Каля ўвахода ёсць ячэйкі, дзе бяздомныя захоўваюць свае рэчы. У ячэйцы Ігара тая самая сумка, з-за якой 16 ліпеня эвакуіравалі 150 чалавек з Міністэрства сям'і ў Варшаве, а Банцэра забрала паліцыя.

У Варшаве працуюць тры начлежкі, месцаў у іх не хапае. Бяздомныя, якім не хапіла месцаў у былым заводзе на вуліцы Мысліборскай, начуюць непадалёк — наўпрост на бетонных канструкцыях закінутага завода. Або стараюцца знайсці альтэрнатыўнае месца для начлегу. Падчас адной са спробаў прабрацца ў такое месца Ігар Банцэр пашкодзіў сабе нагу.

Цяпер па медыцынскую дапамогу ён ездзіць у паліклініку для бяздомных. Праўда, фінансавання для паўнавартаснай медыцынскай дапамогі там не хапае. Прынамсі ёсць чыстыя бінты для перавязкі.

Асноўная частка рэчаў, якія Ігар прывёз з сабой у Польшчу, знаходзіцца ў падвале ў сябра. У дзень, калі Аляксандр здымаў рэпартаж, сябар акурат з’ехаў у іншы горад — і прыйшлося турбаваць яго родных. У якасці падзякі Ігар вырашыў купіць у краме ля могілак кветку.

У Ігара, як і ва ўсіх бяздомных, няма рэгістрацыі па месцы жыхарства. У спробах вырашыць свае бюракратычныя і сацыяльныя праблемы ён ходзіць у розныя адміністрацыі: пакуль безвынікова, часцей за ўсё яго адпраўляюць кудысьці далей. Нейкі чыноўнік адправіў яго ў міністэрства: так ён там і апынуўся са сваёй сумкай, што прывяло да начлегу ў паліцыі.

У пятніцу 19 ліпеня ён паспрабаваў шчасця ў Адміністрацыі раёна Бяляны ў Варшаве. Гэтым разам з ім ветліва размаўлялі і далі паперы для запаўнення.

«Ігар кажа, што гэта рэдкасць і звязвае з тым, што я спрабаваў здымаць інспектара. Працяг гісторыі заўтра ў наступным пасце», — піша Аляксандр Валодзін.

Хто такі Ігар Банцэр

Ігар Банцэр — музыка гродзенскага стрыт-панк-гурта Mister X. У Гродне займаўся культурнай і грамадскай дзейнасцю. Адбываў паўтара года «хіміі» за нібыта хуліганства, якім палічылі танец у стрынгах ля міліцэйскай машыны. Трымаецца антыфашысцкіх і антырасісцкіх поглядаў. Некалькі разоў трапляў у псіхалагічныя шпіталі ў Беларусі, Польшчы і Германіі.