Машын таксі ў Беларусі стане менш, а цэны на перавозкі вырастуць. Так пра наступствы ўказу Лукашэнкі гавораць самі ўдзельнікі рынку таксі. Згодна з указам, з 1 жніўня 2024 года ў тэставым рэжыме пачне працаваць «Рэестр аўтамабільных перавозак пасажыраў у нерэгулярных зносінах». Што змяніцца і як будучыню свайго бізнесу бачаць гродзенскія вадзіцелі і прадпрымальнікі са сферы таксі, даведаўся «Аўтабізнес».
Што за новы ўказ аб таксі?
У «Рэестр аўтамабільных перавозак пасажыраў у нерэгулярных зносінах» трапяць:
- аўтамабільныя пасажырскія перавозчыкі, якія працуюць у нерэгулярных зносінах, у тым ліку таксі;
- транспартныя сродкі (аўтобусы, легкавыя аўто, аўтамабілі-таксі), якія выкарыстоўваюцца для аказання паслуг па перавозках пасажыраў у нерэгулярных зносінах;
- кіроўцы такіх транспартных сродкаў;
- дыспетчары перавозак пасажыраў у нерэгулярных зносінах, дыспетчары таксі.
Што і калі зменіцца для беларускіх таксістаў
Перавозчык павінен будзе падчас рэйса весці відэазапіс у салоне аўто. Відэа павінна будзе захоўвацца 15 дзён.
Стане больш справаздачнасці. Дыспетчар таксі ці сам перавозчык будзе падаваць вельмі разгорнутую інфармацыю: час пачатку і канца змены, аплачаны прабег па кожнай машыне і кожным кіроўцы. Інфармацыя пойдзе ў рэестр і ў падатковую.
Працаваць у сэрвісе «Яндэкс.Таксі» ці іншых падобных без рэгістрацыі ў рэестры не атрымаецца. Нельга будзе перадаць замову перавозчыку, які не ўключаны ў рэестр.
На сустрэчы перавозчыкаў з прадстаўнікамі Мінтранса ў Мінску нагадалі і пра іншыя абавязкі. Напрыклад, вадзіцелі таксі павінны кожныя 5 гадоў павышаць кваліфікацыю. А на аўтамабілі, пазначаным як таксі («з шашачкамі») нельга будзе ездзіць у асабістых мэтах. Захоўваць машыны таксі можна будзе толькі на стаянках, якія ахоўваюцца.
У тэставым рэжыме рэестр пачне працаваць з 1 жніўня. Рэгістрацыя ў гэтым рэжыме будзе бясплатнай. Пачынаючы з 1 лістапада працаваць без уключэння ў рэестр будзе немагчыма. Тады ж рэгістрацыя ў ім стане платнай: 2 базавыя велічыні - за аўтамабіль, 1 — за кіроўцу, 100 — за дыспетчара. За працу без рэгістрацыі ў рэестры перавозчыкам пагражае канфіскацыя выручкі і машыны.
Што пра новыя ўмовы працы думаюць таксісты з Гродна
Кіроўцаў стане менш, а паездкі падаражэюць
Аляксандр з Гродна — кіроўца са стажам, працуе па дамове. Мяркуе, што, прайшоўшы павышэнне кваліфікацыі, вадзіцель лепш не стане:
— На мой погляд, змены, уступіўшы ў сілу, больш за ўсё ўдараць па кішэні кіроўцаў, якія павінны будуць прайсці павышэнне кваліфікацыі коштам 400−500 рублёў тэрмінам 2 тыдні. Ніхто не захоча губляць грошы, якія мог бы зарабіць за гэты час. Улічваючы, што кіроўцаў і так не хапае, а прыцягнуць новых будзе значна складаней, бо кожны, у каго па правах стаж больш за 5 гадоў з моманту іх выдачы, а такіх большасць, будуць абавязаны прайсці павышэнне кваліфікацыі. Навошта гэта? Быццам нехта стане лепш ездзіць. Так што колькасць вадзіцеляў адназначна будзе змяншацца, а паездкі будуць каштаваць даражэй.
Кіроўцы стануць бяднейшымі, а пасажыры будуць баяцца размаўляць
Юры з Гродна працуе ў таксі нядаўна. Перакананы, што відэарэгістратар у салоне аўтамабіля можа адштурхнуць многіх кліентаў:
— Працую ў «Яндэкс.Таксі», атрымліваю працэнт ад выручкі, працую па 8−10 гадзін па строгім графіку, у тым ліку ў начныя змены. На сённяшні дзень мой даход складае ў сярэднім каля 2000 рублёў. Не ведаю, ці буду працягваць працаваць у таксі, таму што асабіста мяне будучыя новаўвядзенні не цешаць. Прыбытак сапраўды больш не стане, хутчэй, паменшыцца, бо ёсць верагоднасць падвышэння кошту паездкі для пасажыраў. Попыт на таксі можа істотна знізіцца. Акрамя таго, мяне трохі бянтэжыць факт абавязковай відэафіксацыі ў салоне. Вядома, калі ёсць спрэчны момант, то запіс дапаможа ўбачыць, на чыім баку праўда. Аднак ужо не атрымаецца проста пагаварыць «па душах» з пасажырам, бо часцяком нам, таксістам, даводзіцца працаваць пазаштатнымі псіхолагамі, выслухоўваючы розныя жыццёвыя перыпетыі ў адносінах. Чалавек выгаварыцца — яму лягчэй становіцца. У якасці падзякі, што яго выслухалі, можа чаявыя пакінуць. А пры відэафіксацыі наўрад ці хтосьці стане адкрываць сваю душу. А другое — абсталяванне для відэафіксацыі таксама нямала каштуе. А значыць, усе выдаткі будуць закладзены ў кошт паездкі. У выніку — непазбежнае павышэнне цэн.
Чытайце таксама: Ездзіць на таксі стане небяспечна — дадзеныя могуць перадаць сілавікам
Новаўвядзенні ўсё толькі ўскладняюць
Індывідуальны прадпрымальнік Ігар з Гродна мяркуе, што можа зноў з’явіцца рынак нелегальных таксі:
— Магчыма, «шэрыя» схемы, ад якіх хочуць пазбавіцца ўказам, пяройдуць да «чорных» дыспетчараў, якія могуць не адлюстроўваць усю выручку. Аднак Яндэкс і так паказваў усю выручку дзяржаве па кожнай машыне. Таму, на маю думку, з новаўвядзеннямі асабліва лепш не стане. Ужо і так ускладнілі работу для ІП пасля адмены спрошчанай сістэмы падаткаабкладання. З-за складанасці ўліку і больш высокіх падаткаў каля 30 працэнтаў легальных таксістаў перасталі працаваць. Усе гэтыя новаўвядзенні толькі ўскладняць працаўладкаванне ў таксі.
Незразумела, каму ад гэтага стане лепш
Гродзенскі прадпрымальнік Уладзімір мае некалькі машын і пакуль не разумее, каму ад змен, якія ўводзяцца, будзе лепш:
— Усё ў шоку. Шмат пытанняў і нюансаў, на якія адказаў няма. Усё ў чаканні афіцыйных больш дакладных тлумачэнняў па прымяненні асобных пунктаў указа. Магу сказаць дакладна, што поўнае выкананне новых правіл зніжае рэнтабельнасць бізнесу да 5% замест 20%-25%. З такім працэнтам рэнтабельнасці рынак таксі зможа існаваць толькі пры значным павышэнні коштаў на паездкі. Але, натуральна, колькасць ахвочых ездзіць за 10 рублёў на таксі замест 2 рублёў значна знізіцца. Людзі будуць перамяшчацца па горадзе даўжэй, асабістыя і працоўныя справы будуць выконвацца за больш доўгія тэрміны. Скажам, малады чалавек 25 гадоў мог бы паехаць у гандлёвы цэнтр «Трыніці» на таксі за 3 рублі і там патраціць грошай. Аднак за 10 рублёў ён не паедзе. А калі будзе дабірацца на грамадскім транспарце, то паедзе зайцам. Каму ад гэтага стане лепей, незразумела.
