Вялікая дыскатэка, бібліялетнік і фэсты на Аўгустоўскім канале. Што новага будзе на XIV Фестывалі нацыянальных культур

XIV Рэспубліканскі фестываль нацыянальных культур у Гродне традыцыйна пачнецца агульным шэсцем дыяспар, пасля якога на Савецкай плошчы пройдзе ўрачысты канцэрт-адкрыццё. Сярод сёлетніх навінак фестывалю — дыскатэка вечарам першага дня і бібліялетнік з перакладной літаратурай ля дома-музея Элізы Ажэшкі.

Упершыню першы дзень фестывалю завершаць моладзевай дыскатэкай позна вечарам. Нумары для канцэрта выбірала спецыяльнае журы ў канцы 2023 года. Таксама іх пакажуць на другі дзень фестывалю на падворках дыяспар, расказала галоўная рэжысёрка фестывалю Вольга Багдановіч «Гродзенскай праўдзе».

Сёлета ў фестывалі ўдзельнічаюць 35 нацыянальнасцей. Новыя ўдзельнікі на фестывалі - прадстаўнікі Аргенціны.

Новыя дрэвы на алеі Сяброўства ў Каложскім парку

Падчас фестывалю на алеі Сяброўства ў Каложскім парку пасадзяць сем новых экзотаў. Высадзяць дрэвы, прысвечаныя Аргентыне, Манголіі, Бураціі, Камеруну і Егіпту. Таксама ў фестывалі даўно не ўдзельнічалі нігерыйцы і пакістанцы, і дрэвы, прысвечаныя іх краінам, пасадзяць толькі сёлета.

Што будзе на беларускім падворку

Беларускі падворак будзе на плошчы Леніна. Там выступяць беларусы замежжа. Ужо падалі заяўкі нашыя землякі з Латвіі, Польшчы і Расіі (Калінінград, Томск).

У другі дзень на беларускім падворку пройдзе мясны фестываль. На ім будуць гульні, квэсты, розыгрыш латарэй і многае іншае. Абяцаюць адкрыццё з кароннай стравай. Адзін з арганізатараў - Гродзенскі мясакамбінат.

Бібліялетнік і рыс В’етнама

Новым для фестывалю стане бібліялетнік 8 чэрвеня. Яго арганізуюць у партнёрстве з абласной навуковай бібліятэкай імя Карскага і прысвецяць літаратуры розных народаў. Пляцоўка летніка будзе каля дома-музея Элізы Ажэшкі. Творы аўтараў розных нацыянальнасцей прадставяць у перакладзе. Спецыяльным госцем стане ўраджэнец Беларусі, заслужаны работнік культуры аўтаномнай рэспублікі Крым паэт Віталь Бартохаў.

У двары Новага замка прэзентуюць турыстычны патэнцыял Беларусі і самыя яркія славутасці. Пакажуць даведнікі, інтэрактыўныя праграмы, экскурсійныя туры.

У выставачнай зале адкрыюць выставу «Рыс і вобразы В’етнама» з чорна-белай фатаграфіяй.
Фота з фестываляў мінулых гадоў пакажуць у горадзе пад адкрытым небам.

200-годдзе Аўгустоўскага канала і фестывалі ў фестывалі

Трэці дзень фестывалю пройдзе 9 чэрвеня, у нядзелю. Яго правядуць на Аўгустоўскім канале ў раёне шлюза Дамброўка. Мерапрыемствы там пачнуцца бліжэй да гадзіны дня.

У праграме будзе фаер-шоу, флэшмоб у нацыянальных касцюмах, спаборніцтва лесарубаў, шоу барабаншчыкаў, выступленне танцавальных калектываў і шмат іншага. Будуць і фестывалі ў рамках фестывалю: фэст рыбнай лоўлі, гастранамічны і дзіцячы фестывалі. Абяцаюць шмат дзіцячых пляцовак і забаў нават для самых маленькіх.

Асобную пляцоўку прысвецяць Аўгустоўскаму каналу, якому сёлета спаўняецца 200 гадоў.

Плануецца таксама франтавы абед і канцэртная праграма з імправізаванай сцэнай на борце машыны — адсылкай да часу Другой сусветнай вайны.