Дзяўчынку, якая выпала з атракцыёна ў Лідзе, перавялі з рэанімацыі ў траўматалогію. Што з ёй зараз?

Адзінаццацігадовая дзяўчынка, якая ўпала з вышыні з атракцыёна ў Лідзе, аднаўляецца. Яе перавялі з рэанімацыі ў артапеда-траўматалагічнае аддзяленне.

Пасля атрымання траўмы дзяўчынку даставілі ў Лідскую цэнтральную раённую бальніцу, дзе ёй аказалі першую дапамогу, правялі інтэнсіўную тэрапію і кансіліум з удзелам рэспубліканскіх спецыялістаў. Праз суткі пацыентку перавялі ў стацыянар Гродзенскай абласной дзіцячай клінічнай бальніцы, дзе працягнулася інтэнсіўная тэрапія. Дзяўчынку прааперавалі.

Зараз аднаўленне ідзе дастаткова інтэнсіўна, і яна пераведзена ў артапеда-траўматалагічнае аддзяленне, расказала дзіцячы ўрач анестэзіёлаг-рэўматолаг Наталля Амельчанка на «Гродна Плюс».

Раней паведамлялі, што пацярпелай правялі дзве траўматалагічныя аперацыі. Стан дзіцяці ацэньвалі як стабільны, сярэдняй ступені цяжкасці. Дзяўчынка была даступна да кантакту ў поўным аб’ёме.

Што здарылася ў Лідзе

Днём 12 траўня ў Лідзе 11-гадовая дзяўчынка ўпала з вышыні літаральна праз некалькі секунд пасля запуску атракцыёну Hammer. У парк забаў, які прыехаў у горад некалькі тыдняў таму, яна прыйшла разам з маці.

Лідскі раённы аддзел Следчага камітэта ўзбудзіў крымінальную справу па ч. 2 арт. 338 (аказанне паслуг, якія заведама не адказваюць патрабаванням бяспекі для жыцця або здароўя спажыўцоў, што пацягнула па неасцярожнасці прычыненне цяжкага цялеснага пашкоджання) Крымінальнага кодэкса Беларусі.